Innlent

Mörg þúsund tonna álframleiðsla hefur tapast

Berghildur Erla Bernharðsdóttir skrifar

Ekki er ljóst hvert heildartjón álversins í Straumsvík er eftir að slökkt var á kerskála þrjú í sumar að sögn forstjóra þess. Byrjað er að endurgangsetja ker í skálanum en ljóst er að mörg þúsund tonna álframleiðsla hefur tapast og mun halda áfram að tapast þar til öll kerin 160 hafa verið endurræst. Almenningi gafst tækifæri á að skoða bæði ker-og steypiskála í álverinu í dag.

Ákveðið var að slökkva á kerskála þrjú í Álverinu í Straumsvík fyrir sex vikum í öryggisskini eftir að hættulegur ljósbogi myndaðist í einu af 160 kerum í verksmiðjunni. Þetta er í annað sinn í 50 ára sögu álversins sem slökkt hefur verið á kerskála og síðast þegar það gerðist árið 2006 var tjón af völdum lokunarinnar sem stóð í tíu vikur metið um fjórir milljarðar króna. Byrjað var að endurgangsetja tvö ker Kerskála þrjú í gær.

Heildarframleiðsla hvers kers getur mest orðið um eitt komma tvö tonn á sólahring. Ef kerin væru öll að skila slíkri framleiðslu væri kerskáli þrjú að skila 192 tonnum á sólahring og um átta þúsund tonnum á sex vikum. Rannveig Rist forstjóri álversins segir tapið mikið.

„Það eru komnar einhverjar ágiskanir en hvað heildartjónið verður mikið er erfitt að segja til um á þessari stundu. Við erum alltaf í stórum tölum  í stóriðjunni það er bara þannig. Það hefur náttúrulega áhrif að lenda í að slökkva á hluta verksmiðjunnar en það er snemmt að segja til um hve mikil eða hver þau verða,“ segir Rannveig.

Hún býst við að það taki langan að endurræsa öll kerin 160 í kerskála þrjú.

„Það tekur mánuði að endurgangsetja þau öll en fyrstu tvö eru komin,“ segir Rannveig.

Fjölskylduskemmtun var í álverinu í dag í tilefni af því að 50 ár eru frá því álframleiðsla hófst þar og um leið hér á landi. Almenningur fékk tækifæri til að skoða bæði ker-og steypuskála. 





Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.