Varabirgðir Írana af auðguðu úrani fara yfir hámarksmagn innan 10 daga

Íran hefur tilkynnt að þann 27. júní muni landið ná að fara yfir það hámarksmagn af auðguðu úrani í varabirgðum sínum, sem er tilgreint í kjarnorkusamningi sem ríkið skrifaði undir árið 2015 ásamt fleiri kjarnorkuríkjum. Frá þessu er greint á vef breska ríkisútvarpsins BBC.

Íran tilkynnti í síðasta mánuði að til stæði að fjórfalda framleiðslu á auðguðu úrani vegna viðskiptaþvingana sem Bandaríkin hafa verið að beita ríkið.

Auðgað úran er notað sem eldsneyti fyrir kjarnaofna en einnig er það notað í kjarnorkuvopn.

Evrópsk stórveldi hafa varað Íran við því að þau muni neyðast til að beita landið viðskiptaþvingunum ef það muni brjóta á kjarnorkusamningnum.

Bretland, Frakkland og Þýskaland hafa reynt allt sem í þeirra valdi stendur til að koma í veg fyrir að samningurinn falli úr gildi, eftir að Donald Trump, forseti Bandaríkjanna, sagði ríkið úr samningnum í fyrra.

Íran hefur kvartað yfir því að olíu- og fjármála stofnanir þeirra hafi orðið fyrir neikvæðum áhrifum eftir að Bandaríkin settu viðskiptaþvinganir á ríkið. Þær hafa orðið til samdráttar í hagvexti og valdið kreppu í hagkerfi landsins.

Snemma í maí, eftir að Trump stöðvaði undanþágur frá viðskiptaþvingununum fyrir ríki sem enn keyptu olíu frá Íran, tilkynnti Íran að það myndi hætta að uppfylla allar þær skuldbindingar sem fylgdu samningnum.

Þar á meðal myndi Íran ekki uppfylla þær kröfur um hámarks varabirgða af þungavatni og auðguðu úrani – hámark auðgaðs úrans eru 300 kg og þungavatns 130 tonn – og myndu byrja á ný að selja efnin til erlendra aðila.

Íran gaf Evrópuríkjunum einnig tímafrest til 7. júní til að koma íranskri olíusölu til varnar og tækist þeim það ekki myndi ríkið byrja að auðga úran á ný í meira mæli og fresta endurhönnun á þungavatns kjarnaofni sínum en meðal eldsneytis hans er plúton, sem hægt er að nota í kjarnorkusprengju.