Erlent

Segja ó­til­greint ríki bera á­byrgð á árás á olíu­flutninga­skip

Atli Ísleifsson skrifar
Árásirnar voru gerðar 12. maí síðastliðinn og rannsakendur segja þær hafa verið afar vel skipulagðar.
Árásirnar voru gerðar 12. maí síðastliðinn og rannsakendur segja þær hafa verið afar vel skipulagðar. EPA/ALI HAIDER

Sameinuðu arabísku furstadæmin fullyrða að mestar líkur séu á því að ríki hafi fyrirskipað árásir á olíuflutningaskip undan strönd landsins á dögunum.

Þetta kemur fram í niðurstöðum rannsóknar sem furstadæmin létu framkvæma og kynnt var á lokuðum fundi í öryggisráði Sameinuðu þjóðanna.

Árásirnar voru gerðar 12. maí síðastliðinn og beindust að fjórum skipum í heildina. Rannsakendur segja þær hafa verið afar vel skipulagðar sem bendi til að ríki frekar en hryðjuverkasamtök hafi staðið þar að baki. Beindust þær einnig að skipum frá Sádi-Arabíu og Noregi.

Ekki er tilgreint um hvaða ríki gæti verið að ræða en Bandaríkjamenn hafa kennt Íran um þær. Íranir þvertaka hins vegar fyrir það og hafa farið fram á að málið verði rannsakað af óvilhöllum aðila.

Samkvæmt rannsókninni var árásin gerð á þann hátt að kafarar fóru að skipunum og festu á þau sprengju. Markmiðið hafi verið að valda skemmdum en ekki að sprengja skipin í loft upp.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.