Tók Albert aðeins mínútu að leggja upp mark í öruggum sigri

Albert Guðmundsson var aðeins mínútu að láta til sín taka í 4-0 sigri PSV á heimavelli gegn Zwolle í hollensku úrvalsdeildinni í kvöld en hann lagði upp síðasta mark PSV í leiknum.

Albert sem lagði upp sigurmark PSV á dögunum þurfti að sætta sig við að byrja á bekknum áfram en eftir rautt spjald á Zwolle undir lok fyrri hálfleiks var alltaf ljóst að toppliðið myndi taka stigin þrjú.

Luuk de Jong skoraði þrívegis áður en Joshua Brenet bætti við fjórða marki PSV eftir undirbúning Alberts á 78. mínútu en Albert hafði aðeins verið inn á í um mínútu.

PSV er með tíu stiga forskot á Ajax á toppi deildarinnar en Ajax á þó leik til góða.