Solari: Afhverju ætti ég að hafa áhyggjur?

Santiago Solari, stjóri Real Madrid, hefur ekki miklar áhyggjur af því að Jose Mourinho sé að taka við Real Madrid eftir að hafa verið rekinn frá Mancester United í dag.

Sögusagnir fóru strax af stað í morgun er Mourinho var rekinn að hann gæti endurnýjað kynnin við Real Madrid en hann stýrði Real frá 2010 til 2013.

Solari sem tók við liðinu fyrr á þessu tímabili segir að hann sofi fyrir sögusögnunum en fyrr á þessu tímabili skrifaði Solari undir samning til 2021.

„Afhverju ætti ég að hafa áhyggjur af orðrómi eða slúðri um Real Madrid?“ sagði Solari á blaðamannafundi í Abu Dhabi í dag þar sem Real spilar á heimsmeistaramóti félagsliða.

„Þetta gerist á hverjum einasta degi. Mér líður alveg eins og þegar ég tók hér við sem stjóri og einnig þegar ég var hér sem leikmaður. Það er að gefa mitt besta á hverjum degi. Þaning sé ég kattspyrnuna.“

Á sama blaðamannafundi var bakvörðurinn skemmtilegi, Marcelo. Hann sagði að honum liði illa fyrir hönd Mourinho en vildi lítið tjá sig um hvort að hann væri rétti maðurinn á réttum tímapunkti fyrir Real.

„Ég vorkenni honum því hann er frábær stjóri og það er leiðinlegt fyrir hann að vera án félags. Það er ekki í mínum verkahring að segja hvort að hann ætti að koma til Real en ég ber mikla virðingu fyrir því sem hann gerði fyrir mig hér.“