Arnór og Hörður byrjuðu í sigri

Arnór Sigurðsson og Hörður Björgvin Magnússon voru í byrjunarliði CSKA Moskvu þegar liðið fékk botnlið Yenisey Krasnoyarsk í heimsókn í sautjándu umferð rússnesku úrvalsdeildarinnar.

CSKA lagði grunninn að sigrinum strax á fyrsta stundarfjórðungnum þar sem Georgi Schennikov og Nikola Vlasic voru á skotskónum og komu heimamönnum í 2-0.

Gestirnir hleyptu þó lífi í leikinn því Pavel Komolov minnkaði muninn í upphafi síðari hálfleiks. Fleiri urðu mörkin hins vegar ekki og 2-1 sigur CSKA Moskvu staðreynd.

Hörður Björgvin spilaði allan leikinn í vörn CSKA en Arnóri var skipt af velli á 77.mínútu.