Fimm sluppu ómeiddir þegar snjóflóð féll á bíla við Flateyri

Tveir bílar lentu í snjóflóði sem féll á Flateyrarveg en fimm manns sem voru í þeim komust allir út ómeiddir og af sjálfsdáðum áður en slökkvilið og björgunarsveitarmenn komu á staðinn.

Hlynur Kristjánsson, varðstjóri hjá slökkviliði Ísafjarðarbæjar, segir að flóðið hafi fallið á Flateyrarvegi á Hvilftarströnd innan við Flateyri. Þeir sem voru í bílunum sem lentu í flóðinu hafi verið komnir úr þeim þegar viðbragðsaðilar komu á staðinn. Fólkið hafi verið skoðað en ekki farið með það á sjúkrahús.

Björgunarsveitarmenn á Flateyri voru kallaðir út vegna flóðsins og starfssystkini þeirra á Ísafirði voru sett í viðbragðsstöðu.

Í færslu á Facebook-síðu lögreglunnar á Vestfjörðum kemur fram að önnur bifreiðin hafi oltið með flóðinu frá veginum og niður í fjöruborð. Læknir og sjúkralið hafi skoðað fólkið en meiðsl þess hafi ekki verið teljandi.

Veginum var lokað og hann verður ekki opnaður aftur í nótt. Einnig hefur verið ákveðið að loka veginum um Súðavíkurhlíð á miðnætti vegna hættu á snjóflóðum.