Ofbeldismenn hættulegastir þegar þeir missa tök á þolanda sínum

Ný rannsókn af upplifun kvenna sem eru að skilja við ofbeldismenn leiðir í ljós að breyta þurfi verklagi hjá sýslumanni þegar kemur að sáttameðferð. Ofbeldismenn séu hvað hættulegastir þegar þeir missa tök á þolanda sínum og á þeim tíma fer sáttameðferðin oft fram.

Á ráðstefnunni Gerum betur, sem haldin var í dag, var meðal annars fjallað um helstu hindranir er varða heimilisofbeldismál í kerfinu. Jenný Kristín Valberg, nemi og starfsmaður Kvennaathvarfsins, gerði þar grein fyrir rannsókn sem hún er að vinna að um upplifanir tíu kvenna af sáttameðferð hjá sýslumanni í kjölfar ofbeldissambands. Sáttameðferð er skylda fyrir foreldra þar sem niðurstaða þarf að liggja fyrir um hvar lögheimili og forræði á að vera. 

„Það var álit allra að þetta hafi verið ofboðslega erfið reynsla. Þeim fannst þær ekki geta komið sjónarmiðum sínum á framfæri. Þær höfðu ekki rödd og gátu ekki tjáð sig inni í herbergi með ofbeldismanninum. Sú staðreynd er að fjórar kvennana komu á undan og létu Sýslumann vita að það væri ofbeldissamband sem þær væru að reyna að ljúka en það virtist ekki skila sér inn í sáttarmeðferðina," segir hún og ítrekar að þetta sé alvarlegur galli. 

 

Sáttameðferð hentar ekki öllum 

Jenný bendir á að konur sem koma úr ofbeldissambandi upplifi oft á tíðum fjárhagslegt ofbeldi og hafnin þær sáttameðferð fylgi því dýr lögfræðikostnaður. Sáttameðferð sé að mörgu leiti góð en mikilvægt sé að sýslumaður líti til ofbeldis þegar fólki er stefnt saman til sátta.

Það sem aftur á móti er ekki að virka er að mæta með ofbeldismanni sem þú ert ný búin að slíta tengsl við. Það vita allir að á þeim tíma sem ofbeldismaður missir í raun stjórn á þolanda sínum er tíminn sem hann er í raun hættulegastur. Á þeim tíma eru þær einar í sáttameðferð, án stuðnings, og eru að reyna að semja upp á framtíðina," segir hún.