Gleymast strákarnir?

Tryggvi Hjaltason er faðir þriggja barna þar af tveggja drengja. Eldri drengurinn hóf skólagöngu síðasta vor og ræddi Tryggvi áður við fjölmarga um skólakerfið og viðaði að sér rannsóknum um það. Þar sem kom fram að þriðjungur þeirra getur ekki lesið sér til gagns eftir grunnskóla og strákar voru aðeins rúmur þriðjungur þeirra sem skráði sig í Háskóla Íslands á síðasta ári.

„Það er vaxandi ávísun hegðunarlyfja til drengja, þeir eiga erfitt með að sofa og einbeita sér. Strákum er minna hrósað en stelpum í grunnskóla, “ segir Tryggvi. 

Undrandi á bágri stöðu

Niðurstöðurnar komu honum verulega á óvart.

„Ég hafði ekki hugmynd um að ástandið væri svona slæmt og að við hefðum svona mörg góð og aðgengileg rannsóknargögn um málið,“ segir Tryggvi.  

Hann  sagði frá niðurstöðum sínum á Facebook og viðbrögðin þar komu einnig á óvart.

„Það voru 160.000 Íslendingar búnir að lesa statusinn minn síðast þegar ég gáði og yfir 200 manns hafa haft samband við mig, foreldrar, kennarar, drengir og fullorðnir karlmenn sem sáu sig í þessum gögnum sem ég var að lýsa,“ segir hann. 

Endurskoðunar er þörf

Tryggvi telur að endurskoða þurfi skólakerfið.

„Strákar virðast læra miklu betur gegnum leik og verklegt nám en bóklegt,“ segir Tryggvi. 

Hann tekur dæmi um breytingar sem hafa orðið á nálgun CCP.

„Fyrir 10-15 árum þá tóku tölvuleikjaspilarar allt frá klukkustund og uppí viku að lesa sér til um nýjan leik frá okkur en í dag gefa strákar sér ekki nema 10-15 mínútur í mesta lagi til að kynna sér leik og ef hann er ekki áhugaverður þann tíma þá spila þeir hann ekki aftur. Mögulega þarf skólinn að aðlaga sig betur að þessu breytta umhverfi,“ segir Tryggvi.

Siduri Poli forseti nýsköpunarmiðstöðvar fyrir ungt fólk í Stokkhólmi lýsti svipuðum hugmyndum í fréttum okkar í vetur

„Skólakerfið hefur ekki breyst mikið frá 19. öld en á sama tíma hafa orðið gríðarlegar þjóðfélagsbreytingar. Áður fyrr fengum við upplýsingar í skólunum en nú fáum við þær úr símunum okkar og tölvum. Við þurfum því að skilgreina uppá nýtt hvert hlutverk skólans á að vera í nútíma samfélagi,“ sagði Siduri Poli.