Hið minnsta tvær líkamsárásir og 12 fíkniefnabrot komu inn á borð lögreglunnar í nótt í tengslum við tónlistarhátíðina Secret Solstice. Hátíðin hefur farið fram í Laugardal um helgina.
Í skeyti lögreglunnar til fjölmiðla í morgun eru málin reifuð stuttlega. Tvær líkamsárásir hafi verið bókaðar, sú fyrri um klukkan 21 og hin síðari upp úr miðnætti. Um hafi verið að ræða „hnefahögg og spörk“ en meiðsl á fólki eru ekki tíunduð. Fleiri ofbeldismál hafi þó komið upp í gærkvöldi, þau hafi hins vegar ekki verið bókuð sérstaklega.
Þá hafi lögreglan haft afskipti af 12 einstaklingum vegna vörslu þeirra á fíkniefnum. Ekki fylgir sögunni hvort um hafi verið að ræða söluskammta eða smáræði til einkaneyslu. Þá voru hendur hafðar í hári vímaðs ökumanns sem reyndi að yfirgefa tónleikasvæðið í nótt. Hann er jafnframt sagður hafa ekið ökuréttindalaus.
Líkamsárásir í Laugardal
Tengdar fréttir
Tugir fíkniefnamála til viðbótar í Laugardalnum í nótt
Alls hafa um sextíu fíkniefnamál komið upp í Laugardalnum þar sem Secret Solstice-tónlistarhátíðin fer fram það sem af er helginni.
Í takti við það sem gerist á öðrum hátíðum
Björn Teitsson fjölmiðlafulltrúi tónlistarhátíðarinnar Secret Solstice segir að fjöldi fíkniefnamála á hátíðinni sé í takt við það sem gerist á öðrum sambærilegum hátíðum.
