Grátbiður um að eiginmaðurinn verði rekinn úr landsliðinu fyrir framhjáhald

Eiginkona kínverska fótboltamannsins Jiang Zhipeng grátbiður um að hann verði rekinn úr kínverska landsliðinu sem og félagsliði sínu Guangzhou R&F fyrir langvarandi framhjáhald.

Zhipeng spilaði víst ömurlega í leik á móti Íran í undankeppni HM 2018 á dögunum en hann gaf eina mark leiksins í 1-0 tapi með döprum skalla til baka á markvörðinn sinn.

En það var svo eftir leikinn sem allt fór í hundana hjá Zhipeng.

Eiginkona hans, Zhang Zhiyue, setti færslu á Weipo-síðu sína (kínversk örbloggsíða) þar sem hún opinberaði langverandi framhjáhald Zhipeng. Hann er búinn að sækja um skilnað frá eiginkonunni eftir að verða ástfanginn af viðhaldinu sem heitir Xiao Bing.

„Ég studdi hann þegar hann var enn þá fátækur strákur og móðir mín kom fram við hann eins og sinn eigin son. Fjölskyldan mín hjálpaði okkur með einni milljón jenum þegar hann keypti sitt fyrsta hús í Sjanghæ. Við héldum ekki brúðkaupsveislu og sambandið var aldrei opinbert,“ segir Zhiyue á síðunni sinni.

„Hann var að sofa hjá öðrum konum í þrjú og hálft ár af fjögurra ára löngu hjónabandi okkar og nú er hann að reyna að koma mér mér í gröfina eftir tíu ára samband.“

Eiginkonan birti einnig dónaleg skilaboð á milli Zhipeng og viðhaldsins í færslunni á Weipo-síðunni. Hún vill hvorki að hann fái að spila fyrir lið né land lengur.

„Kæri hera Cai Zhenhua, forseti kínverska knattspyrnusambandsins, ég grátbið þig um að reka Zhipeng úr kínverska landsliðinu,“ segir hún.

„Kæri herra Wang Yuping, framkvæmdastjóri knattspyrnusambandsins í Guangdong, ég bið þig um að reka Jiang Zhipeng úr Guangzhou R&F.“

„Kæri herra Zhang Li, forseti Guangzhou R&F FC, ég bið þig um starfa með lögfræðingi mínum og leggja til samning Jiang Zhipeng sem sönnunargagn fyrir rétti. Ég trúi að réttlætinu verði fullnægt,“ segir Zhang Zhiyue.