Það voru ófáir sem festu sig í færðinni í dag. En fegurðin við svona daga - fyrir utan sólina og skjannahvítan snjóinn - er hjálpsemi og samstaða fólks. Fréttamaður fór á flakk eins og má sjá í myndskeiðinu, ýtti bílum og heyrði í fólki sem var að grafa bílinn sinn út.
Hjalti Jóhannes Guðmundsson, skrifstofustjóri á umhverfis-og skipulagssviði Reykjavíkurborgar, þakkar Reykvíkingum þolinmæðina og segir það taka nokkra daga í viðbót að moka í húsagötum og ryðja bílastæði við leik- og grunnskóla.
En almenningur getur gert gagn. Til dæmis fært bíla sem eru á tengileiðum og svo hefur lögregla beint þeim tilmælum til fólks að huga að grýlukertum og snjóhengjum, sérstaklega verslunareigendum á Laugavegi. Einnig hefur Pósturinn beðið fólk um að greiða leið blaðbera að póstkössum svo snjór og hálka skapi ekki hættu.
