Aldrei fleiri gómaðir undir áhrifum

Akstur undir áhrifum áfengis og/eða fíkniefna hefur náð nýjum hæðum á höfuðborgarsvæðinu. Lögreglan á höfuðborgarsvæðinu segir að aldrei hafi fleiri verið grunaðir um slíkan akstur en nú í apríl. Þetta kemur fram í nýjustu afbrotatölfræðiskýrslu lögreglustjórans á höfuðborgarsvæðinu sem birt var í dag.

Alls bárust lögreglunni 655 tilkynningar um hegningarlagabrot í apríl. Þá fækkaði þjófnuðum, kynferðisbrotum og ofbeldisbrotum gagnvart lögregluþjónum miðað við meðalfjölda síðustu sex mánaða.

Hins vegar fjölgaði fíkniefna- og umferðarbrotum nokkuð í mánuðinum.

„Sérstaklega fjölgaði brotum þar sem ökumenn voru grunaðir um akstur undir áhrifum ávana- og fíkniefna, sem skýrir fjölgun fíkniefnabrota að einhverju leyti. Í apríl voru skráð 144 brot þar sem ökumaður var grunaður um akstur undir áhrifum ávana- og fíkniefna og 105 brot þar sem ökumaður var grunaður um ölvun við akstur,“ segir í tilkynningu frá lögreglunni.

Skráð brot vegna aksturs undir áhrifum hafa ekki verið fleiri eftir að ný lög tóku gildi árið 2006, sem breyttu verklagi lögreglu í þessum málum.

„Þessi mikla fjölgun brota er afrakstur sérstaks átaks sem farið var í á varðsvæði lögreglustöðvar 1, sem nær frá Seltjarnarnesi að Laugardalnum.“