Danskur ráðherra orðinn þreyttur á Facebook

Ráðherra mennta- og rannsóknarmála í Danmörku, Søren Pind, hefur ákveðið að loka opinberum Facebook-reikningi sínum þar sem hann geti ekki samþykkt kerfi sem leitast eftir að gera hann sífellt háðari því.

Þetta skrifar Pind í færslu á samskiptamiðlinum í morgun. Hann er sá stjórnmálamaður Danmerkur sem hefur verið með hvað flesta fylgjendur á Facebook, eða rúmlega 42 þúsund.

Um páskana tók Pind það sem hann kallaði „föstu fyrir sálina“ þegar hann lét samfélagmiðla vera í nokkra daga. Sagði hann Lars Løkke Rasmussen forsætisráðherra hafa veitt sér innblástur en sá fastar af og til í hefðbundnum skilningi þess orðs.

Pind segir að sá tími sem fari í að vera inni á síðunni bæti ekki upp fyrir þá ánægju sem af því hlýst. Hann vilji ekki verða enn háðari kerfum sem hann hafi ekki áhuga á að vera hluti af.

„Ég les færri bækur. Ég skrifa færri samhangandi blogg og færslur,“ segir Pind um afleiðingar þess að vera á Facebook. Hann lýkur svo lýkur hann svo máli sínu á að þakka fylgjendum sínum. „Það vem samtími okkar þarf er samhengi og hægð, ekki sundrungu og hraða. En takk fyrir margra ára samræður. Þær hafa að stærstum hluta verið ánægjulegar.“