Skutlaði sér á bankaræningja og afvopnaði hann

Viðskiptavinur banka í Pennsylvania í Bandaríkjunum skutlaði sér á vopnaðan bankaræningja síðastliðinn föstudag. Robert Sakosky tókst að afvopna ræningjann, John Ryall, og reka hann á brott úr bankanum. Atvikið náðist á öryggismyndavélar bankans og hefur lögreglan birt myndband af ráninu misheppnaða.

Ryall flúði frá bankanum en Sakosky gat bent lögreglunni á hvert hann hefði farið. Ryall var svo handtekinn skömmu seinna og starfsmenn bankans báru kennsl á hann sem ræningjann.



Hann hafði mætt með grímu yfir andlitinu en Sakosky tókst að rífa hana af áður en Ryall flúði. Hann var svo ákærður fyrir rán og ógnanir.