Máttu ekki taka sjúka kettlinga frá mæðrum

„Við furðum okkur á mörgu í sambandi við þennan úrskurð,“ segir Arndís Björg Sigurgeirsdóttir, formaður Villikatta. Samkvæmt úrskurði atvinnuvega- og nýsköpunarráðuneytisins (ANR) er félaginu óheimilt að fjarlægja sjúka kettlinga, yngri en átta vikna, frá mæðrum sínum til meðhöndlunar.

Samtökunum barst í upphafi júlímánaðar tilkynning um ketti í neyð. Þegar á staðinn var komið voru þar um sjötíu kettir en í hópnum voru illa farnir kettlingar. Brugðust fulltrúar Villikatta við með því að fjarlægja sex kettlinga og koma þeim til dýralæknis. Þar var einn kettlingurinn aflífaður og tveir settir á sýklalyf vegna augnsýkingar.

„Dýralæknirinn sagði að hún myndi tilkynna ástand kattanna til Matvælastofnunar (MAST). Stofnunin gerði okkur hins vegar að skila kettlingunum því samkvæmt lögum er bannað að aðskilja ketti yngri en átta vikna frá móður sinni,“ segir Arndís Björg.

Formaðurinn segir að þau hafi fylgt fyrirmælum stofnunarinnar og samkvæmt hennar bestu vitneskju hafi stofnunin ekki haft kettina undir eftirliti. Þegar fulltrúar Villikatta komu aftur á staðinn höfðu einhverjir kettlinganna drepist vegna veikindanna. ANR hefur nú staðfest afstöðu MAST.

„Hvernig getur það staðist að ef við sjáum fárveikan kettling þá megum við ekki taka hann til dýralæknis? Okkur var sagt að við ættum að tilkynna MAST um þá. Það er mjög erfitt eftir klukkan fjögur. Og hvað á þá að gera?“ spyr Arndís. Þá þykir henni skjóta skökku við að heimilt sé að fjarlægja kálfa frá mæðrum sínum.

Í málsástæðum MAST fyrir ráðuneytinu kom fram að Villikettir hefðu ekki sinnt tilkynningarskyldu þeirri sem á samtökunum hvílir. Dýraeftirlitsmaður MAST hefði farið á staðinn degi eftir að þau fengu vitneskju um kettina og var þá fyrirskipað að dýrum yrði komið til dýralæknis.

Málið er ekki hið eina sem kom til kasta ráðuneytisins vegna samtakanna. Villikettir kærðu einnig fyrirmæli MAST um að samtökin láti af því að klippa af eyrum villikatta sem vanaðir hafa verið. Væri það í andstöðu við dýraverndarlög. Því máli var vísað frá þar sem um tilmæli var að ræða en ekki stjórnvaldsákvörðun.

„Við berjumst gegn villiköttum með því að vana þá og þegar það hefur verið gert þá klippum við um fimm millimetra af vinstra eyra. Með því móti er unnt að bera kennsl á ketti sem hafa verið vanaðir. Þetta er aðferð sem viðhöfð er í Evrópu, Bandaríkjunum og Kanada. Annaðhvort klippum við af eyrunum eða hættum okkar starfi,“ segir Arndís.