Tveir látnir í árás manna á háskólasvæði í Kenía

Tveir starfsmenn við háskóla í Kenía eru látnir eftir að hópur manna hóf skothríð á bíla á háskólasvæðinu í morgun. Árásin átti sér stað á svæði Tækniháskólans í Mombasa.

Að sögn sjónarvotta særðust jafnframt fjölmargir nemendur, tveir lögreglumenn og bílstjóri í árásinni. Enn hefur enginn lýst yfir ábyrgð á árásinni. Reuters greinir frá þessu.

Sómölsku hryðjuverkasamtökin al-Shabaab hafa margoft staðið fyrir árásum í Kenía. Þannig létu 148 manns lífið í árás liðsmanna hópsins á Háskólann í Garissa fyrir um tveimur árum.