MAST: Krafðist of mikillar nákvæmni að skjóta hrossin í hausinn

Ekki var hægt að aflífa hestana í Hörgársveit, sem Fréttablaðið fjallaði um í morgun og vakið hafa mikla athygli, með þeim aðferðum sem kveðið er á um í reglugerð um velferð hrossa „þar sem hún krefst mikillar nákvæmni,“ að sögn Matvælastofnunar.

Í umfjöllun Fréttablaðsins í morgun kemur fram að Matvælastofnun (MAST) lét skjóta fjóra graðhesta á færi á Skriðulandi í Hörgársveit á fimmtudaginn í síðustu viku. Viku seinna hafði hræjunum ekki verið fargað og lágu þar eins og hráviði um landareignina en upphaf málsins má rekja til þess að á annan tug graðhesta var í fóður­litlu hólfi á Skriðulandi.

Segja hræin hafa verið flutt úr augsýn

MAST segir það ekki rétt, í bréfi til fréttastofu, sem greint var frá í fréttinni að tveir graðhestanna hafi borist langa leið eftir að þeir voru skotnir. Stofnunin segir að hið rétta sé að hræin hafi verið flutt úr augsýn frá þjóðvegi og þeirra hesta sem átti eftir að aflífa.

Í frétt Fréttablaðsins er jafnframt greint frá því að dýrin hafi verið aflífuð með bógskoti. Vísað er til 14. greinar reglugerðar um velferð hrossa þar sem segir að aflífa eigi hross með því að skjóta þau í ennið. „Heimilt er að aflífa hross með skoti í enni […] með skotvopni með lausu skoti. Einnig er heimilt að nota pinnabyssu með pinna sem gengur inn í heila.“

Matvælastofnun segir í skeyti sínu til fréttastofu að umrædd aflífun hrossanna hafi verið í fullu samræmi við lög og reglur um velferð dýra. Samkvæmt reglugerð um velferð hrossa sé skylt að aflífa alvarlega veik eða slösuð hross eins fljótt og auðið er, ef meðhöndlun er ekki möguleg.

„Ekki var hægt að nota þær aðferðir sem kveðið er á um í reglugerð um velferð hrossa til að aflífa dýrin, þar sem hún krefst mikillar nákvæmni. Þarna var um mikið slasaða, ótamda graðhesta að ræða sem dýralæknir úrskurðaði að þyrfti að aflífa. Því var notuð sú aflífunaraðferð sem þótti best m.t.t. velferðar hrossanna, í samráði við eigendur þeirra. Matvælastofnun telur að rétt aðferð hafi verið valin við aflífun hrossanna í samræmi við löggjöf um velferð dýra.“

Þá segir stofnunin að eigandi hrossanna hafi ekki verið sviptur umráðum yfir þessum hrossum, eins og sagt var frá. Stofnunin ítrekar, rétt eins og kom fram í fréttinni, að það sé ekki hlutverk MAST að fjarlægja hræ af jörðum bænda heldur sé það alfarið á ábyrgð eigenda. Hrossunum hafi nú verið komið í hrægám sveitarfélagsins.

Hér að neðan má sjá hvernig um var að litast í Skriðulandi í Hörgársveit.