Lýsa því yfir að laxeldi muni bæta lífsgæði íbúa

Arnarlax og Fjallabyggð hafa gefið út sameiginlega viljayfirlýsingu um samstarf um undirbúning og könnun á forsendum þess að að setja upp starfsstöð í Ólafsfirði fyrir laxeldi fyrirtækisins í Eyjafirði. Er þar um að ræða bæði hafnaraðstöðu og eins aðstöðu í landi undir starfsemi Arnarlax hf. í Eyjafirði.

„Ef nauðsynleg leyfi fást til að hefja laxeldi í utanverðum Eyjafirði mun það hafa jákvæð samfélagsleg áhrif og bæta lífsgæði íbúa svæðisins með beinum og óbeinum hætti. Verði af fyrirhuguðum áformum er ljóst að það mun skapa tugi starfa í Ólafsfirði og nágrenni,“ segir í yfirlýsingunni.

Áform Arnarlax eru um árlega framleiðslu á tíu þúsund tonnum af laxi í utanverðum Eyjafirði. Fyrirtækið keypti Fjarðalax í fyrra en það fyrirtæki hafði í árslok 2014 kynnt áform um framkvæmdir innarlega í firðinum.

Fram kemur í yfirlýsingunni að sú fyrirætlun sé endurskoðuð til að „að skapa sátt til framtíðar um uppbyggingu á sjálfbæru laxeldi í Eyjafirði“. Markmiðið sé jafnvægi milli umhverfislegra, efnahagslegra og samfélagslegra aðstæðna á svæðinu.

Arnarlax er þannig sagt vera að skoða umhverfisaðstæður við Ólafsfjörð í Eyjafirði í samstarfi við Fjallabyggð. „Sérstaklega verða skoðaðar hugmyndir um að færa eldisstaði norðar í Eyjafjörð þar sem útlit er fyrir mjög jákvæðar umhverfislegar aðstæður til framtíðaruppbyggingar og þróunar laxeldis á svæðinu.“

Uppbygging sem Arnarlax þarf er hafnaraðstaða fyrir vinnubáta, aðstaða fyrir biðkvíar og brunnbát, húsnæði fyrir fóður og ýmsan eldisbúnað, auk sláturhúss og vinnslu. Um 130 manns eru sagðir starfa hjá Arnarlaxi í seiðaeldisstöðvum, sjóeldi, vinnslu, sölu, markaðsmálum og yfirstjórn. Að auki tengist tugir annarra starfa þjónustu við Arnarlax með beinum eða óbeinum hætti.

„Störf í fiskeldi henta bæði konum og körlum með fjölbreytta menntun,“ segir í yfirlýsingunni sem undirrituð er af Gunnari I. Birgissyni, bæjarstjóra Fjallabyggðar, og Víkingi Gunnarssyni, framkvæmdastjóra Fjarðalax.