Dagný í byrjunarliðinu annan leikinn í röð

Dagný Brynjarsdóttir var í byrjunarliði Portland Thorns sem tapaði 2-0 fyrir Seattle Reign í bandarísku kvennadeildinni í nótt.

Þetta var þriðja tap Portland í síðustu fjórum leikjum. Liðið er í 5. sæti deildarinnar með 18 stig, sex stigum á eftir toppliði North Carolina Courage.

Dagný hefur verið í byrjunarliðinu í síðustu tveimur leikjum Portland. Hún er sem kunnugt er að komast aftur á ferðina eftir erfið meiðsli.

Dagný, sem er á sínu öðru tímabili hjá Portland, hefur komið við sögu í fjórum leikjum á tímabilinu. Leikurinn í nótt var sá fyrsti í sumar þar sem hún spilar allar 90 mínúturnar.