Innlent

Melaskóli að grotna niður

Benedikt Bóas skrifar
Melaskóli er barn síns tíma. Sjálfstæðismenn í borginni lögðu aftur fram að hafinn væri undirbúningur fyrir viðbyggingu strax enda rúmar skólinn ekki alla sem þangað þurfa að koma á hverjum morgni.
Melaskóli er barn síns tíma. Sjálfstæðismenn í borginni lögðu aftur fram að hafinn væri undirbúningur fyrir viðbyggingu strax enda rúmar skólinn ekki alla sem þangað þurfa að koma á hverjum morgni. Mynd/Þorvaldur Ö. Kristmundsson
Í tillögu Sjálfstæðisflokksins, sem lögð var fram öðru sinni á borgarráðsfundi í gær, er lagt til að undirbúningur verði nú þegar hafinn að viðbyggingu við Melaskóla. Mun fleiri nemendur séu nú í skólanum en hann rúmar með góðu móti. Hefur það margvíslegan vanda í för með sér. Aðgengi fyrir fatlaða er óviðunandi, mötuneyti skólans stenst ekki kröfur, salernisaðstaða nemenda og starfsfólks er úrelt og óásættanleg, sérkennsluaðstöðu er ábótavant, aðstöðuskortur háir sérgreinakennslu og starfsaðstaða kennara er af mjög skornum skammti.

Miðað við fyrirliggjandi spár um fjölda nemenda er ljóst að húsnæðis­þörf Melaskóla verður ekki leyst til framtíðar án viðbyggingar, segir ennfremur í tillögunni. Í minnisblaði Skóla- og frístundaráðs kemur fram að varðandi bráðavanda á að fara í tilteknar endurbætur og viðhald á núverandi húsnæði og er það gert að beiðni skólans. Stjórnendur vilji ekki skipta upp nemenda- og starfsmannahópnum og séu frekar tilbúnir að búa við þröngan kost gegn því að farið verði í tilteknar aðgerðir.

Varðandi framtíðarskipan var niðurstaðan að stækka viðbyggingu og fara í nauðsynlegar endurbætur á eldra húsnæði skólans. Samþykkt var að vísa tillögunni til meðferðar við gerð fjárhags- og fjárfestingaáætlunar.

Í breytingartillögu borgarráðs er lagt til að ráðist verði í brýnar viðhaldsframkvæmdir og endurbætur við skólann í sumar og haust, þar með talið málun innanhúss, viðhald og bón á gólfefni og tilfærslur innanhúss. Þá verði skólanum boðið viðbótarhúsnæði í nágrenninu frá og með næsta hausti. 




Fleiri fréttir

Sjá meira


×