Glæpagengi í Árósum ógna öryggi almennings

Átök á milli glæpagengja hafa versnað í vesturhluta Árósa undanfarið. Í gær átti sér stað skotárás í borginni seinni hluta dags og haft er eftir vitni að skotið hafi verið þremur til fjórum skotum úr byssu. Enginn slasaðist. Lögreglan hefur þó óskað eftir liðsauka frá lögreglunni í Christiansborg til að berjast gegn ástandinu. Danska ríkisútvarpið greinir frá.

Lögreglan í Árósum segir þetta vera hluta af átökum á milli glæpagengja í borginni. Stríð glæpagengjanna má rekja til þess að glæpaklíka frá Kaupmannahöfn, Loyal to Familia, er að reyna að ná fótfestu í Árósum. Hún hefur verið þar í borg síðan í lok maí og hafa átökin versnað dag frá degi síðan.

Ástandið í borginni er fremur slæmt að sögn lögreglu og talið er að nánast daglega séu gerðar morðtilraunir. Þetta veldur almennum borgurum miklum óþægindum enda um mikið áreiti að ræða.