Modric hefur átt betri daga: Bar vitni í fjársvikamáli eftir tapið gegn Íslandi

Luka Modric, leikmaður Evrópumeistara Real Madrid og króatíska landsliðsins, hefur átt betri daga en þá þrjá síðustu. Sky Sports greinir frá.

Hann bar fyrirliðaband króatíska liðsins á Laugardalsvellinum á sunnudaginn þar sem strákarnir okkar gerðu sér lítið fyrir og lögðu Modric og félaga að velli, 1-0, með marki Harðar Björgvins Magnússonar.

Modric gat svo ekki flogið beint í sumarfrí eins og flestir aðrir sem spiluðu sama leik því hann þurfti að fara heim til Zagreb og bera vitni í fjársvikamáli gegn Zdravko Mamic, fyrrverandi framkvæmdastjóra Dinamo Zagreb, en hann gengdi þeirri stöðu frá 2003-2016.

Modric viðurkenndi fyrir dómstólum að hann samdi við Mamic um að greiða Dinamo Zagreb helming upphæðarinnar sem Tottenham keypti hann á sumarið 2008 en kaupverðið var á milli 18,5 og 20,2 milljóna punda.

Króatíski miðjumaðurinn viðurkenndi einnig að eftir að hann lét félagið fá sinn skerf lét hann bróður og son Mamic fá óuppgefna upphæð í reiðufé.

„Það sem ég vildi gera var að greiða upp allar mínar skuldir við Mamic svo ég skuldaði honum ekki neitt í framtíðinni,“ sagði Luka Modric fyrir rétti.

Zdravko Mamic er einnig ákærður fyrir að hafa dregið að sér fé í sölum á nokkrum leikmönnum frá Zagreb-liðinu en í dag mætir Dejan Lovren, leikmaður Liverpool, fyrir réttinn og vitnar um sölu sína frá Dinamo Zagreb til Lyon í Frakklandi.

Zdravko Mamic er, þrátt fyrir þessi réttarhöld, enn þá talinn valdamesti maðurinn í króatíska fótboltanum.