Hlustað á Íslendinga um málefni hafsins

Íslendingar ættu að beina kröftum sínum að málefnum hafsins í umræðum um loftslagsbreytingar á alþjóðavettvangi, að mati Guðna Th. Jóhannessonar, forseta. Líklegra sé að hlustað verði á okkur sem eyþjóð í Atlantshafi.

Guðni ávarpaði ársfund Umhverfisstofnunar í morgun en loftslagsbreytingar voru þema hans að þessu sinni. Benti hann á ráðstefnu um málefni hafsins sem haldin verður á vegum Sameinuðu þjóðanna í New York í næsta mánuði þar sem hann taldi Íslendinga geta látið rödd sína heyrast.

„Við erum eyþjóð í miðju Atlantshafi. Því er líklegra að á okkur sé hlustað um málefni hafins en á sviðum þar sem ekki er eins augljóst að við höfum sérþekkingu,“ sagði forsetinn sem taldi Íslendinga geta aukið slagkraft sinn með þessum hætti á alþjóðavettvangi.

Íslenskir embættimenn og stjórnmálamenn verði því í mikilvægu hlutverki á fundinum.

Svo gott að „henda ananasinum af pítsunni“

Einstaklingar, stjórnvöld og fyrirtæki geti öll látið í sér heyra og lagt sitt af mörkum. Sjálfur sagðist Guðni þurfa að láta til sín taka í ys og þys alþjóðamálanna.

Hvatti hann fólk til að læra, fræðast og trúa sérfræðingum sem hafi rannsakað málin. Það væri okkar hinna að taka til okkar þann vísdóm og gera heiminn ögn betri.

„Þá getum við sagt við barnabörnin: „Við reyndum og okkur tókst það“. Ég vil frekar geta sagt það en „Það var bara svo gott að eiga tvo bíla eða henda ananasinum af pítsunni“,“ sagði Guðni og uppskar hlátur fundargesta.