Víkingalottóið tekur breytingum og verð á hverja röð hækkar

Víkingalottóið mun taka breytingum frá og með deginum í dag þar sem svokallaðar ofurtölur og bónustölur munu heyra sögunni til. Þá mun verð á hverja röð hækka um 20 krónur.

Í tilkynningu frá Íslenskri getspá segir að áfram verði dregnar út sex aðaltölur af 48 en ofurtalan og bónustölurnar munu víkja fyrir svokallaðri Víkingatölu. Víkingatölur eru frá einum og upp í átta og er ein Víkingatala valin með hverri röð.

Hver röð mun hækka um tuttugu krónur á Íslandi og kostar nú hundrað krónur. Jóker mun áfram kosta tvö hundruð krónur.

„Ofurpotturinn heyrir því sögunni til en fyrsti vinningur, fyrir sex réttar tölur og Víkingatölu, hækkar í grunninn og ætti hann að ganga oftar út en áður. Þá er tryggt að fyrsti vinningur verði aldrei lægri en 3 milljónir evra, jafngildi um 340 milljóna króna.

Einnig verða tveir hæstu vinningsflokkarnir sameiginlegir milli landa, í stað eins sameiginlegs vinningsflokks áður en þak verður á fyrsta vinningi. Það virkar þannig að þegar hann er kominn í 35 milljónir evra (u.þ.b. 4 milljarða ISK) fer umframfjárhæðin í 2. vinningsflokk í næsta útdrætti. Þá verða nú einnig veittir vinningar fyrir þrjár réttar tölur sem mun fjölga ánægðum vinningshöfum í hverri viku. Loks verður gerð sú veigamikla breyting að vinningshlutfallið hækkar úr 40% í 45% þannig að heildarfjárhæð vinninga hækkar,“ segir í tilkynningunni.