Sóknir hvattar til að sameinast

Trúmál Búast má við því að aukinn þungi færist í umræðu um sameiningu sókna innan kirkjunnar á næstunni. Þetta er mat Einars Karls Haraldssonar, sem Kirkjuþing hefur valið sem talsmann sóknanna.

Einar Karl bendir á samþykkt kirkjuráðs frá því fyrr í mánuðinum þar sem athygli forráðamanna sóknanna er vakin á því að þeir geti óskað eftir stuðningi jöfnunarsjóðs sókna til þess að jafna stöðu til sameiningar. „Jöfnunarsjóður hefur meðal annars það hlutverk að jafna aðstöðu sókna og veita þeim sóknum aðstoð þar sem tekjur duga ekki fyrir nauðsynlegum útgjöldum og telur kirkjuráð að sameiningar sókna geti fallið undir hlutverkið,“ segir í samþykktinni frá 9. maí.

Fréttablaðið greindi í gær frá því að Breiðholtssókn á í viðræðum við Fella- og Hólasókn um sameiningu. Einar Karl segir sameiningar fleiri sókna ekki komnar á framkvæmdastig en býst við meiri umræðu um það á næstunni. „Meðal annars í ljósi þessarar samþykktar kirkjuráðs og í ljósi þess að sumar sóknir eru orðnar það fámennar að það ber ekki uppi sóknarstarf,“ segir hann.

„Það eru að vísu litlar sóknir úti á landi sem hafa sameinast. Það er töluvert af litlum sóknum. Síðan hafa oft og tíðum verið umræður um meira samstarf á milli sókna og um starfssvæði þar sem menn hefðu samstarf og leituðu hagræðingar,“ segir Einar Karl. Þar vísar hann til samstarfs sókna á höfuðborgarsvæðinu en líka á Austurlandi, á svæðinu í kringum Egilsstaði.

Hann segir ástæðurnar verri rekstrarstöðu sókna. „Þessi skerðing á sóknargjöldum er mjög íþyngjandi. Það er breyting á samsetningu íbúa, sem stafar af íbúaþróun í borginni og fleiri koma frá öðrum löndum og síðan hefur fækkað í þjóðkirkjunni,“ segir hann.

Einar Karl segist vonast til að það muni færast meiri alvara í viðræður ríkis og kirkju. Við afgreiðslu fjáraukalaga árið 2015 hafi verið ákveðið að taka öll fjárhagsleg samskipti ríkis og kirkju til endurskoðunar. Þeirri vinnu hefði átt að ljúka 15. febrúar 2016. „Núna erum við komin í maí 2017 og það verður að segjast eins og er að það hefur ekki verið mikil alvara í þessum viðræðum,“ segir Einar Karl og bætir við að eftir bankahrunið hafi sóknargjöld verið skorin niður um fjórðungi meira en það sem undirstofnanir innanríkisráðuneytisins þurftu að þola. Heildarskerðing á framlögum til safnaða þjóðkirkjunnar frá árinu 2008 nemi rúmum 5,8 milljörðum króna.