Podolski kvaddi með sigurmarki

Lukas Podolski spilaði sinn síðasta landsleik fyrir Þýskaland í kvöld og það var vel við hæfi að hann skoraði sigurmarkið gegn Englandi.

Lokatölur í Dortmund í kvöld 1-0 með marki Podolski. Markið kom rúmum 20 mínútum fyrir leikslok. Þrumuskot utan vítateigs sem söng efst uppi í samskeytunum. Geggjað mark.

Þetta var 49. landsliðsmark Podolski. Aðeins Miroslav Klose og gerd Müller hafa skorað fleiri. Klose 71 og Müller 68. Markið kom með hans fyrsta skoti á markið í leiknum.

Þetta var 130. landsleikur Podolski. Hann er þriðji leikjahæsti landsliðsmaður Þýskalands frá upphafi á eftir Lothar Matthäus (150) og Klose (137).

Alls tók Podolski þátt í sjö stórmótum með þýska landsliðinu og varð einu sinni heimsmeistari.