Vilja segja upp samkomulagi ríkis og þjóðkirkju um kirkjujarðir og launagreiðslur

Fimm þingmenn Pírata lögðu í dag fram þingsályktunartillögu á Alþingi þess efnis að fela ríkisstjórninni að hefja undirbúning að uppsögn samkomulags við þjóðkirkjuna um kirkjujarðir og launagreiðslur presta og starfsmanna þjóðkirkjunnar frá árinu 1997.

Samkomulagið lýtur að afhendingu þjóðkirkjunnar á kirkjujörðum til ríkisins gegn skuldbindingum þess um launagreiðslur til presta og annarra starfsmanna þjóðkirkjunnar. Eftir slit samkomulagsins yrðu kirkjujarðirnar áfram í ríkiseigu en þjóðkirkjan þyrfti sjálf að standa straum af launakostnaði presta og annarra starfsmanna.

„Flutningsmenn tillögunnar telja löngu tímabært að binda enda á greiðslur ríkisins fyrir kirkjujarðirnar og leggja því til að ríkisstjórninni verði falið að hefja undirbúning að slitum samkomulagsins frá 1997 og öðrum samningum sem því tengjast.” Segir í greinargerð með þingsályktunartillögunni.

Í tillögunni er gert ráð fyrir rúmum tíma til verksins.

„Stefnt verði að því að samkomulagi þessu og öðrum samningum sem að því lúta verði endanlega slitið fyrir árslok 2020.”