Sölvi skoraði í fyrsta leiknum í Tælandi

Sölvi Geir Ottesen skoraði í sínum fyrsta leik fyrir tælenska úrvalsdeildarliðið Buriram United í dag.

Sölvi gekk til liðs við Buriram í síðustu viku og þreytti frumraun sína með liðinu þegar það mætti Chonburi í 1. umferð tælensku úrvalsdeildinni í dag.

Leikar fóru 2-2 en Sölvi tryggði Buriram stig þegar hann jafnaði metin 12 mínútum fyrir leikslok.

Chonburi komst í 0-2 með tveimur mörkum rétt fyrir hálfleik. Jaja minnkaði muninn í 1-2 á 75. mínútu og aðeins þremur mínútum síðar jafnaði Sölvi metin.

Næsti leikur Buriram er gegn Thai Navy á laugardaginn.