Fær kannski ekki að spila út af hárgreiðslunni

Ganamaðurinn Asamoah Gyan er einn af 46 leikmönnum í Sameinuðu arabísku furstadæmunum sem eru sagðir vera með ósiðlegt hár.

Þeir sem eru með ósiðlegt hár að mati knattspyrnuyfirvalda þar í landi fá fyrst viðvörun áður en þeim er meinað að spila. Gyan gæti því lent í því að fá ekki að spila út af hárgreiðslu.

Það hefur komið fyrir þar í landi að leikmenn fá ekki að spila vegna greiðslunnar. Knattspyrnuyfirvöld líta svo á að hætta sé að ungir knattspyrnumenn vilji herma eftir greiðslunum sem þeim finnst vera ósiðlegar.

Svipaðar reglur eru í Sádi Arabíu og þar var markvörður skikkaður í klippingu fyrir leik á dögunum.

Gyan er í láni hjá Al Ahli frá kínverska liðinu Shanghai SIPG og hann gæti farið fyrr til baka ef hann sættir sig ekki við að breyta um hárgreiðslu.