Lísbet og Guðmundur Oddur vilja formennsku í Heimdalli

Lísbet Sigurðardóttir, laganemi, sækist eftir formennsku í Heimdalli, félags ungra sjálfstæðismanna í Reykjavík á aðalfundi félagsins þann 10. mars næstkomandi og Guðmundur Oddur Eiríksson, viðskiptafræðinemi, gefur kost á sér sem varaformaður Heimdallar.

Stefnir í spennandi formannsslag þar sem Friðrik Þór Gunnarsson og Elísabet Inga Sigurðardóttir bjóða sig sömuleiðis fram til formanns og varaformanns Heimdalls eins og Vísir greindi frá í gær.

Tíu einstaklingar bjóða sig einnig fram með Lísbetu og Guðmundi í stjórn félagsins. Í tilkynningu segir að öll eigi þau það sameiginlegt að vilja efla starfið frá því sem verið hefur.

Vilja þau halda fjölbreytta málfundi um málefni ungs fólks í Reykjavík og „vera aðhald og samviska fulltrúa Sjálfstæðisflokksins í borginni og leggja sitt af mörkum við að búa til betri borg með lægri álögum og auknu frelsi fyrir íbúanna.“

„Þau telja einnig brýnt að opna starfið upp á gátt, fá fleira ungt fólk til liðs við félagið og efla þannig veg ungs fólks í Sjálfstæðisflokknum. Það er jafnframt skýrt markmið hópsins, undir stjórn Lísbetar, að standa vörð um frelsi einstaklingsins í hvívetna og hvetja ungt fólk til þátttöku í stjórnmálum, hvort sem það er á vettvangi Alþingis eða borgarstjórnar,“ segir í tilkynningunni.

Lísbet er 20 ára laganemi á öðru ári við lagadeild Háskóla Íslands. Hún lauk stúdentsprófi frá Menntaskólanum í Reykjavík árið 2015. Hún var varaforseti Framtíðarinnar í MR, sat í ritstjórn Menntaskólatíðinda og í kjörstjórn skólans. Þá sat hún bæði í stjórn Vöku og í funda- og menningarmálanefnd Orators, félags laganema við Háskóla Íslands. Hún situr nú í skemmtinefnd Sambands ungra sjálfstæðismanna og er virk starfi ungra sjálfstæðismanna. Lísbet starfar sem hjúkrunarritari á gjörgæsludeild Landspítalans.

Guðmundur Oddur er 22 ára nemi í viðskiptafræði við Háskólann í Reykjavík. Hann lauk stúdentsprófi frá Menntaskólanum á Akureyri 2014 en þar tók hann virkan þátt í félagsstarfi og sat meðal annars í stjórn nemendafélagsins. Guðmundur starfaði hjá Arion banka á síðasta ári og starfar einnig sem dæmatímakennari í þjóðhagfræði og tölfræði við Háskólann í Reykjavík.

Í framboði til stjórnar Heimdallar eru

Andrea Björnsdóttir, viðskiptafræðinemi við Háskólann í Reykjavík,

Andri Ingason, viðskiptafræðinemi við Háskólann í Reykjavík og gjaldkeri Markaðsráðs félags viðskiptafræðinema í HR,

Anna Bryndís Zingsheim, nemandi við Verzlunarskóla Íslands,

Anney Ýr Geirsdóttir, lyfjafræðinemi við Háskóla Íslands,

Anton Andri Guðmundsson, hagfræðinemi við Háskólann í Reykjavík,

Anton Reynir Hafdísarson, viðskiptafræðinemi við Háskólann í Reykjavík,

Ólafur Freyr Ólafsson, viðskiptafræðinemi við Háskólann í Reykjavík,

Helena Guðmundsdóttir, nemandi við Verzlunarskóla Íslands,

Ólafur Hrafn Kjartansson, nemandi við Verzlunarskóla Íslands

Úlfur Þór Andrason, laganemi við Háskóla Íslands.