Íslendingar Evrópumeistarar í netkotru

Íslenska landliðið í kotru varð í kvöld Evrópumeistarar í netkotru. Kotra er íslenska heitið á backgammon og verður Evrópukeppnin í kotru haldin á Íslandi í október á þessu ári. Fjalarr Páll Mánason, stjórnarmeðlimur Kotrusambands Íslands, segir að hver sem er geti lært kotru.

„Það er keppt í gegnum netþjón. Allt er svosem orðið í gegnum netið núna, skák og hvaðeina. Þarna komu saman 24 lið sem hófu keppni um mitt síðasta ár. Það eru fimm spilarar í hverju landsliði og svo er spilað þannig að þegar lið hefur tapað þrisvar sinnum þá er það dottið úr leik. Það er nokkuð handahófskennt fyrst hverjir spila gegn hvor öðrum. Svo er það þannig að þegar lið hefur tapað þrisvar þá er það dottið úr keppni,“ segir Fjalarr Páll í samtali við Vísi.

„Þetta æxlaðist þannig að núna í lok desember kom það í ljós að við vorum þrjú lið þarna efst sem höfðum öll tapað tvisvar. Það vorum við, Pólland og Austurríki. Þannig að við spiluðum innbyrðis, gerðum það reyndar tvisvar því það endaði þannig í fyrstu umferð að við unnum öll sitt á hvað. En svo spiluðum við aðra umferð á því núna í byrjun árs. Þetta kláraðist í kvöld með hreinum úrslitaleik milli Stefáns Freys Guðmundssonar frá íslandi og Andreas Fisher frá Austurríki.“

Besta spilið

Fjalarr segir mikið á döfinni hjá Kotrusambandi Íslands.

„Evrópukeppnin í Backgammon verður haldin á Íslandi í október á þessu ári. Það er mjög stórt mál. Það er það sem helst er að frétta. Það er frábært að hafa náð að vinna þetta núna og vonandi að þetta nái einhvern veginn að vekja einhvern áhuga á þessu spili sem er ekki nærri nógu vinsælt hérna á þessu landi. Allir sem spila þetta eru sammála um að þetta sé eiginlega besta spilið.“

En hvað þarf til vilji maður verða Evrópumeistari í kotru? Hvaða hæfileika þarf að hafa?

„Það þarf náttúrulega í fyrsta lagi að kunna kotru. Svo þarf að æfa sig og þetta er svona einstaklega skemmtileg blanda af heppni og hæfileikum, eiginlega meira en nokkuð annað spil sem ég þekki. Skák er frábært spil en það vita allir sem tefla að þeir eiga ekki séns í að vinna einhvern sem er betri en þeir í skák. Þannig að það verður jafnvel svona elítista sport að því leytinu að maður á bara ekki séns. Í þúsund skipti myndi ég aldrei vinna Magnus Carlsson í skák,“ segir Fjalarr Páll. 

„En útaf þessum heppnis þætti í kotru þá geta ólíklegustu spilarar unnið. En auðvitað eftir því sem leikirnir eru lengri og til langs tíma þá munu þeir bestu vinna oftar og verða farsælli, því þeir leika alltaf réttu leikina. En það er samt alltaf þessi heppnis þáttur. Þú þarft alltaf að hafa heppnina með þér til að vinna mót.“

Fjalarr segir að enga stund taki að læra spilið.

„Það tekur tíu mínútur fyrir hvern sem er að læra þetta. Svo gæti það tekið kannski alla ævina að reyna að mastera þetta.“

Upplýsingar um starfsemi Kotrusambandsins og viðburði á næstunni fást á kotra.is eða Facebook síðu Kotrusambands Íslands.