Eldri borgarar passa börnin, lána pening og veita húsaskjól

Spurningakannanir voru lagðar fyrir fólk á aldrinum 67 til 85 ára árin 2006 og 2016 og spurt um framlag þeirra til samfélgsins. Rannsakanda fannst mikilvægt að rannsaka dulið framlag eldri borgara sem ekki er metið til fjár.

„Öll umræða um eldri borgara, hefur og hafði verið þegar ég byrjaði árið 2005, svo neikvæð. Það var svo mikið talað um þá sem þiggjendur og veika en ég vissi náttúrulega af fullt af fólki sem var ákaflega aktívt og mikið að gera,” segir Ingibjörg H. Harðardóttir, lektor og höfundur rannsóknarinnar.

Árið 2006 mátu 77 prósent svarenda heilsufar sitt mjög eða frekar gott en 79 prósent árið 2016. Ríflega helmingur svarenda hafði sinnt barnagæslu árið 2006. Í fyrra höfðu tveir af hverjum þremur sinnt barnagæslu. Tæplega 65 prósent karla og 70 prósent kvenna. Flestir passa börnin heima hjá sér og mikið er um skutl í tómstundir.

„Þeir eru mest að passa fyrir þá sem eru með mestu menntunina og bestu launin. Fólk sem getur ekki tekið sér frí frá vinnu,” segir Ingibjörg.    

Einnig hefur það færst í vöxt að eldra fólk aðstoði með ýmsu vinnuframlagi. Fyrir tíu árum voru það 22 prósent svarenda en í fyrra 42 prósent.

Ingibjörg segir það hafa komið fram í viðtalsrannsókninni að eldra fólk er ekki að gera mikið úr vinnuframlagi sínu.

„Við spurðum hvað fólk væri að gera. Það svaraði oft „Ég dunda og dútla.“ Þá spurðum við hvað fælist í dundinu. Þá fengum við svör eins og það væri að setja upp eldhúsinnréttingu fyrir dóttur sína eða klára sumarbústaðinn með bróður sínum,” segir Ingibjörg.

Bæði árin höfðu um 45 prósent eldri borgara veitt ættingjum húsaskjól til skemmri tíma en 17 prósent til lengri tíma.

59 prósent svarenda veittu fjölskyldu sinni fjárhagslegan stuðning í fyrra, en 54 prósent árið 2006.

Bæði árin sinnti fjórðungur svarenda sjálfboðaliðastörfum.

„Þetta framlag er mikilvægt fyrir þá sjálfa. Mikilvægt fyrir þá sem njóta og þetta er mjög ekónómískt hagkvæmt fyrir samfélagið,” segir Ingibjörg.