Lífið í tilboðum

Það er gríðarlega dýrt að lifa á Íslandi og þá sérstaklega á höfuðborgarsvæðinu. Nánast daglega koma fréttir um að húsnæðisverð hækki, matur er fokdýr og ef fólk vill endilega stunda þann hræðilega ósið drekka áfengi þá þarf nánast að taka bankalán til þess, bara svo örfá dæmi séu tekin. En ef maður leggur dálítið á sig er mögulega hægt að auðvelda róðurinn eilítið þannig að til sparist nokkrir aurar aukalega sem er hægt að eiga upp í til dæmis fokdýra húsaleigu eða eitthvert eilífða rlánið. Lífið fór á stúfana og skoðaði hvernig og hvar er best að spara í mat og drykk.

Morgnar

Morgnar eru erfiður tími til matarkaupa, kaffi er augun úr og réttir eins og rista brauð með avacado eru ástæðan fyrir því að unga kynslóðin á ekki fyrir húsnæði (það hefur ekkert með nýfrjálshyggjuna að gera). Það eru margir sem vilja meina að morgunmatur sé í raun ekki eins nauðsynlegur og oft er talað um, að „mikilvægasta máltíð dagsins“ sé bara frasi búinn til til að selja morgunkorn. Hér verður ekkert rætt um sannleiksgildi þessara fullyrðinga, en ein góð lausn á morgunmatar-vandamálinu er að stoppa við í næsta bankaútibúi á leiðinni í vinnuna og fæ sér einn frían kaffibolla. Morgunmatur meistarans!

Hádegi

Hádegið er mjög auðvelt viðureignar enda bjóða flestir veitingastaðir upp á einhverskonar hádegistilboð. Þægilegasta leiðin til að ramba á gott tilboð er Nova appið þar sem er boðið upp á 2 fyrir 1 tilboð sem gilda gjarnan í hádeginu. Líka gott fyrir svanga að fá sér tvöfaldan skammt á verði einfalds.

Drykkir

Drykkja er mikill ósiður. En fyrir þá sem endilega vilja stunda drykkju er hugtakið happy hour himnasending. Flestir barir og veitingastaðir eru með einhverskonar útgáfu af happy hour – það er kannski best að velja sér einn bar, leggja happy hour tímana á minnið og mæta alltaf þá og fara svo snemma heim þegar happy hour er lokið. Appið Appy Hour er góð leið til að finna út hvenær þessar hamingjustundir fara fram. Önnur leið er að skoða hvenær opnanir á listasýningum eiga sér stað og mæta – bæði fær maður að njóta listar en einnig er oftast einhverjar veigar í boði. Tvær flugur í einu höggi.

Afþreying

Afþreying snýst mest um hugmyndaflug. Á sumrin er hellingur í boði. Sumar líkamsræktarstöðvar eru tengdar sundlaugum og þar er hægt að fá ákveðið tveir fyrir einn tilboð í afþreyingu/líkamsrækt. Garðar geta talist ákveðin afþreying – þar eru oft styttur og annað sem hægt er að skoða. Allskyns útivist er í boði víðsvegar um borgina. Á veturnar er þetta þó aðeins erfiðara. Smára- og Háskólabíó bjóða upp á þriðjudagstilboð. Síðan er það auðvitað bókasöfn – þar er hægt að sitja án þess að borga krónu og lesa bækur, en það er besta afþreying allra tíma.

Nammi

Hér er langbest að fara á nammibar á laugardegi og troðfylla einn poka og láta hann duga út vikuna, það eru lang bestu kaupinn.

Kvöldverður:

Hér kemur dæmi um matseðil fyrir vikuna:

Mánudagur

Mánudagstilboð Pizzunar.

Þriðjudagur

Þriðjudagstilboð Hraðlestarinnar.

Miðvikudagur

Miðvikudagstilboð Eldsmiðjunnar.

Fimmtudagur

Culican er með valda rétti á tilboði alla daga.

Föstudagur

Subway – bátur mánaðarins, hefur komið ýmsum í gegnum nám.

Laugardagur

Pylsutilboðið í 10-11 hefur mögulega bjargað lífum.

Sunnudagur

Latin sunnudagur á Burro – heilir þrír réttir ásamt drykk.