Lögreglan í Ástralíu starfrækti eina stærstu barnaníðingsvefsíðu heims

Lögreglan í Ástralíu starfrækti eina stærstu barnaníðingsvefsíðu sem er að finna á myrkranetinu (e. dark web) í næstum því heilt ár. Í aðgerðinni, sem var háleynileg og leiddi til handtaka víða um heim, þóttist lögreglan vera stofnandi síðunnar.

Um var að ræða síðu sem heitir Childs Play og var vefur þar sem barnaníðingar og fólk með barnagirnd gat átt í samskiptum. Þetta kemur fram í umfjöllun norska blaðsins Verdens Gang sem greindi frá aðgerðinni eftir að hafa fylgst með síðunni svo mánuðum skipti.

Rannsókn VG leiddi blaðamennina á skrifstofur lögreglunnar í Queensland í Ástralíu á fund starfshópsins Argo sem sérhæfir sig í málum er varða misnotkun á börnum. Þeir vissu þó ekki að þeir hefðu rekist á viðkvæma og háleynilega lögregluaðgerð.

Stofnandinn handtekinn fyrir að nauðga barni

Argos hafði tekið yfir starfsemi Childs Play þremur mánuðum áður, í september árið 2016, villt á sér heimildir sem stjórnandi síðunnar eftir að hann var handtekin í Bandaríkjunum fyrir að nauðga fjögurra ára gamalli stúlku. Lögreglan deildi efni þar sem börn voru misnotuð á síðunni til að ekki kæmist upp um að þeir væru að fylgjast með síðunni. Aðrir notendur héldu áfram að deila og skoða efni á síðunni á meðan lögreglan stjórnaði henni.

Þetta var ekki í fyrsta sinn sem Argos tekur til slíkra aðgerða, en VG spyr meðal annars hvort hægt sé að réttlæta að lögreglan deili ólöglegu efni til að koma upp um glæpsamlega starfsemi.

Síðan var ein sú stærsta af sinni tegund þar til lögreglan tók hana úr birtingu í síðasta mánuði. Hún var stofnuð í apríl árið 2016 og voru rúmlega milljón notendur skráðir. Þrjú til fjögur þúsund þeirra voru virkir notendur.

Um hundrað „framleiðendur“ mynduðu nauðganir af börnum og deildu myndböndum og myndum á síðunni. Í kjölfar aðgerða Argos hafa lögregluyfirvöld í tólf löndum hafið rannsókn á notendum síðunnar.

Munu áfram notast við slíkar aðferðir

Jon Rouse, yfirmaður Argos, segir að aðgerðirnar hafi bjargað börnum um allan heim. Notendur voru nær algjörlega nafnlausir þökk sé forritinu Tor.

„Þessi nafnleynd og þessi „griðastaður“ sem síðan á að vera gerði það að verkum að hægt var að deila efni sem skaðaði börn. Það bjó til vettvang fyrir þetta fólk að deila hryllilegri hugmyndafræði sinni og miðil til að deila aðferðum til að komast hjá lögreglunni,“ segir Rouse í samtali við The Guardian.

„Teymið okkar og önnur viðlíka teymi um allan heim hafa það eina markmið að stöðva kynferðislega misnotkun á börnum og við munum áfram vinna saman við að lauma okkur inn, skemma fyrir og taka slíkar síður niður.“

Stofnandi síðunnar, Kanadamaðurinn Benjamn Faulkner, afplánar nú lífstíðardóm í fangelsi fyrir nauðgun á fjögurra ára stúlku í Virginíuríki á síðasta ári. Samverkamaður hans við brotið var Bandaríkjamaðurinn Patrick Falte, sem einnig var stjórnandi slíkrar síðu. Báðir mennirnir eru sérfræðingar í netöryggi.