164 milljónir í ungbörn í Reykjavík

Reykjavíkurborg opnar ungbarnadeildir í leikskólum sínum en aðgerðaáætlun í leikskólamálum var samþykkt í borgarráði í gærmorgun.

Frá og með næsta hausti verða settar á fót ungbarnadeildir við fjóra leikskóla borgarinnar og verða þær sérhæfðar, með aðstöðu, leikrými og búnaði sem hæfir þroska og tryggir öryggi barna á öðru og þriðja aldursári. Stefnt er að því að slíkar ungbarnadeildir verði starfræktar í öllum hverfum borgarinnar.

Í fyrsta áfanga verða settar á fót sjö ungbarnadeildir við leikskólana Miðborg, Holt (Breiðholti), Sunnuás (Laugardal) og Blásali (Árbæjarhverfi) og taka þær til starfa í ágúst/september 2017. Alls verður pláss fyrir um 90 börn á þessum sjö ungbarnadeildum. Einnig er stefnt að því að reisa nýjan ungbarnaleikskóla á Kirkjusandi sem mun starfa með leikskólanum Hofi.

Plássum fyrir ung börn verður fjölgað í sjálfstætt starfandi leikskólum í borginni um allt að 200. Niðurgreiðslur vegna barna hjá dagforeldrum verða hækkaðar og settur á fót starfshópur með þátttöku félaga dagforeldra sem mun móta tillögur um leiðir til að auka gæði og öryggi í þjónustu dagforeldra. Þá stendur til að auglýsa eftir nýjum dagforeldrum til að mæta aukinni eftirspurn eftir þjónustu þeirra.

Heildarkostnaðar vegna fyrrnefndra aðgerða nemur tæpum 164 milljónum króna á þessu ári. 

Fréttin birtist fyrst í Fréttablaðinu