Mourinho: Orð mín voru ætluð Conte en ekki ykkur

Stærsta tap Jose Mourinho í ensku úrvalsdeildinni kom á hans gamla heimavelli í dag. Þá valtaði Chelsea yfir lærisveina Mourinho í Man. Utd, 4-0. Hann hefur aðeins einu sinni tapað stærra á ferlinum en það var 5-0 tap gegn Barcelona árið 2010.

„Þetta byrjaði strax mjög illa en við vorum nálægt því að jafna. Svo komast þeir í 2-0,“ sagði Mourinho en Pedro kom Chelsea yfir í leiknum eftir aðeins 29 sekúndur.

Sjá einnig: Chelsea niðurlægði Manchester United

„Við mætum með ákveðna leikáætlun og þá er ekki hægt að fá á sig mark eftir nokkrar sekúndur. Við vildum sækja í dag og sýndum hvað við getum í stöðunni 1-0. Annað og þriðja markið þeirra kemur eftir skyndisóknir. Ef við hefðum minnkað muninn í 2-1 þá hefði þetta orðið annar leikur.“

Stjóri Manchester-liðsins var miður sín út af varnarleik sinna manna.

Sjá einnig: Eiður: José kann ennþá að ná því besta út úr Chelsea

„Við gerðum ótrúleg mistök í vörninni. Einstaklingsmistök og fyrir þau var refsað grimmilega. Við fengum engin stig og erum sex stigum frá toppnum. Nú þurfum við að fara að vinna leiki og saxa á toppliðin.“

Þetta var auðvitað líka sérstakur leikur fyrir Mourinho þar sem hann var á sínum gamla heimavelli. Hann talaði heillengi við Antonio Conte, stjóra Chelsea, í leikslok en vildi ekki gefa upp hvað hann sagði.

„Áhorfendur hegðuðu sér mjög vel. Það sem ég sagði við Conte voru orð sem voru ætluð honum en ekki ykkur.“