Ranieri sendir strákana sína í vikufrí

Claudio Ranieri, knattspyrnustjóri Leicester City, gaf sínum mönnum vikufrí eftir tapið fyrir Arsenal í gær.

Leicester á ekki leik aftur fyrr en 27. febrúar og Ranieri var búinn að lofa sínum mönnum vikufríi ef þeir fengju níu stig út úr leikjunum þremur gegn Liverpool, Manchester City og Arsenal.

Lærisveinar Ranieri fengu reyndar „bara“ sex stig út úr þessum þremur leikjum en Ranieri ákvað samt að senda sína menn í vikufrí til að hlaða batteríin fyrir lokasprettinn í ensku úrvalsdeildinni. Sjálfur fer Ranieri til heimaborgar sinnar, Rómar.

„Ég var búinn að lofa þeim einnar viku fríi ef við myndum fá níu stig. Við fengum bara sex stig en ég er samt ánægður með leikmennina,“ sagði Ítalinn.

„Ég sagði við myndumst sjást aftur á mánudaginn í næstu viku. Þeir eiga þetta skilið. Þeir spiluðu frábærlega í dag,“ bætti Ranieri við eftir tapið fyrir Arsenal í gær.

Leicester komst yfir með marki Jamie Vardy á lokamínútu fyrri hálfleiks en varð svo fyrir áfalli þegar Danny Simpson var rekinn af velli eftir níu mínútna leik í þeim seinni. Einum fleiri náðu Arsenal-menn að tryggja sér sigurinn og minnkuðu þar með forskot Leicester á toppnum niður í tvö stig.

„Ég veit ekki hvert þeir munu fara, kannski til Dúbaí? Þeir fara þangað sem þeir vilja,“ sagði Ranieri um mögulega áfangastaði strákanna hans í fríinu sem er eflaust kærkomið eftir mkið álag í vetur.