Stúdentar skora á þingmenn að afgreiða LÍN-frumvarpið

Formenn Stúdentaráðs Háskóla Íslands (SHÍ), Félags Stúdenta við Háskólann á Akureyri (FSHA), Stúdentafélags Háskólans í Reykjavík (SFHR) og Nemendasambands Tækniskólans (NST) hafa skorað á þingmenn að klára frumvarp um námslán og námsstyrki, svokallað LÍN-frumvarp á yfirstandandi þingi.

„Stúdentar munu ekki una því að bíða til næsta kjörtímabils eftir endurbótum á námsaðstoðarkerfinu. Ekki er hægt að horfa fram hjá því að þetta frumvarp er risastórt skref í átt að því námsaðstoðarkerfi sem við viljum sjá á Íslandi í framtíðinni, en það hefur í för með sér þau atriði sem stúdentar hafa lengi barist fyrir, til að mynda fyrirframgreiðslur, beina námsstyrki og 100% framfærslu,“ segir í yfirlýsingu frá félögunum fjórum.

Frumvarpið hefur verið afar umdeilt bæði hjá hagsmunaaðilum sem og á stjórnmálasviðinu en undanfarið hefur það verið í vinnslu hjá Allsherjar- og menntamálanefnd þar sem það hefur tekið töluverðum breytingum. Hefur stjórnarandstaðan gefið það út að hún muni standa í vegi fyrir því að frumvarpið verði samþykkt. Skora félögin á stjórnarandstöðuna að hætta við þessi áform sín.

„Að þessu sögðu skorum við á stjórnarandstöðuna að leggja kosningaslaginn til hliðar og hlusta á stúdenta, sem eru langþreyttir á því að vera notaðir í pólitískum leikjum á milli stjórnmálaflokka. Við krefjumst þess að málið fari á dagskrá og verði tekið fyrir í 2. umræðu sem allra fyrst,“ segir í yfirlýsingunni.

Þá vilja félögin að lögð verði fram og samþykkt þingsályktunartillaga um að haldið verði áfram að vinna að málefnum Lánasjóðs íslenskra námsmanna á næsta kjörtímabili og að stúdentar verði hafðir með í ráðum.

Áskorun SHÍ, FSHA, SFHR og NST í heild sinni

„Formenn Stúdentaráðs Háskóla Íslands (SHÍ), Félags Stúdenta við Háskólann á Akureyri (FSHA), Stúdentafélags Háskólans í Reykjavík (SFHR) og Nemendasambands Tækniskólans (NST) skora hér með, fyrir hönd félaganna, á þingmenn stjórnarflokkanna jafnt sem stjórnarandstöðunnar að klára frumvarp um námslán og námsstyrki á þessu þingi.

Stúdentar munu ekki una því að bíða til næsta kjörtímabils eftir endurbótum á námsaðstoðarkerfinu. Ekki er hægt að horfa fram hjá því að þetta frumvarp er risastórt skref í átt að því námsaðstoðarkerfi sem við viljum sjá á Íslandi í framtíðinni, en það hefur í för með sér þau atriði sem stúdentar hafa lengi barist fyrir, til að mynda fyrirframgreiðslur, beina námsstyrki og 100% framfærslu.

Við erum sammála um að þær breytingar sem allsherjar- og menntamálanefnd leggur til að gerðar verði á frumvarpinu eru jákvæðar og að frumvarpið sé í heild sinni gífurleg kjarabót fyrir stúdenta.

Að þessu sögðu skorum við á stjórnarandstöðuna að leggja kosningaslaginn til hliðar og hlusta á stúdenta, sem eru langþreyttir á því að vera notaðir í pólitískum leikjum á milli stjórnmálaflokka. Við krefjumst þess að málið fari á dagskrá og verði tekið fyrir í 2. umræðu sem allra fyrst.

Jafnframt krefjumst við þess að lögð verði fram og samþykkt þingsályktunartillaga um að haldið verði áfram að vinna að málefnum Lánasjóðs íslenskra námsmanna á næsta kjörtímabili og að stúdentar verði hafðir með í ráðum.

Fyrir hönd félaganna,

Davíð Snær Jónsson, formaður NST

Helga Margrét Mason Jóhannesdóttir, formaður FSHA

Kristófer Már Maronsson, formaður SHÍ

Rebekka Rún Jóhannesdóttir, formaður SFHR“