Kennsla í lögreglufræði hefst á morgun

Kennsla í lögreglufræði hefst á morgun en fræðin verða kennd við Háskólann á Akureyri. Nám í lögreglufræðum hefur ekki verið kennt á háskólastigi hér á landi fyrr en nú.

Frumvarp þess efnis að lögreglunám yrði fært upp á háskólastig var samþykkt á Alþingi í vor en fjórir háskólar sóttust eftir því að hafa umsjá með náminu.

Í kjölfarið var skipuð matsnefnd af mennta- og menningarmálaráðherra til þess að fara yfir umsóknir skólanna fjögurra. Nefndin komst að þeirri niðurstöðu að Háskóli Íslands væri hæfastur til að taka við kennslu- og rannsóknarstarfsemi á sviði lögreglufræða. Háskóli Íslands hlaut 128 stig af 135 mögulegum en Háskólinn á Akureyri 116 stig af 135 mögulegum.

Þrátt fyrir að nefndin hafi metið það svo að Háskóli Íslands væri hæfastur skólanna ákvað mennta- og menningarmálaráðherra að ganga til samninga við Háskólann á Akureyri og mun skólinn verða sá eini á landinu sem býður upp á námsleiðina.

Í fréttatilkynningu frá Háskólanum á Akureyri kemur fram að Eyjólfur Guðmundsson, rektor skólans, telji yfirfærslu námsins á háskólastig í góðum höndum í HA. „Við höfum reynsluna af hjúkrunar- og iðjuþjálfunarfræði og því vitum við mæta vel að það er mikilvægt að koma til móts við starfandi lögreglumenn með próf úr Lögregluskólanum. Þeir hafa nú þegar sýnt náminu mikinn áhuga og í boði er að taka diplómagráðu á tveimur árum samhliða vinnu,“ segir hann.

Samkvæmt tilkynningunni eru 150 nemar skráðir í námið  í lögreglufræðum og koma þeir víðsvegar að af landinu.