Mynt frá 11. öld skilað sextíu árum eftir fund

Mynt frá því er Ólafur kyrri réð ríkjum yfir Íslandi var skilað til minjavarðar Norðurlands í síðustu viku. Peningurinn fannst skömmu eftir heimsstyrjöldina síðari en ástæða þess að honum var skilað nú er fréttaflutningur af fornminjafundi liðinnar viku.

„Þetta er mynt sem hefur fylgt mér lengi. Ég held ég hafi fundið hana skömmu fyrir 1950,“ segir Hermann Jónsson, fyrrverandi hafnarvörður á Akureyri.

„Ég var bara patti, um sjö ára að ég held, að leika mér að bílum í moldinni heima þegar ég rakst á hann. Einhverra hluta vegna ákvað ég að taka hann upp. Síðan þá hef ég geymt myntina.“

Hermann ólst upp á Mýlaugsstöðum í Aðaldal en flutti til Akureyrar árið 1963. Peningurinn var með í för. Hann segist lengi hafa ætlað sér að fara með hann til minjavarðar en það hafi alltaf gleymst þar til nú.

„Ég fór með hann núna í síðustu viku eftir að það var sagt frá sverðinu sem fannst í Skaftárhreppi. Það var vítamínsprautan sem þurfti til,“ segir Hermann.

Peningurinn er tæpir fimmtán millimetrar í þvermál og úr silfri. Fyrri eigandi hans hefur sennilega notað hann sem hálsmen því á einum stað í jaðri hans hefur verið gert lítið gat. Þar má ímynda sér að snæri hafi verið dregið í gegn og myntin sett um háls einhvers.

„Peningurinn hefur örlítið látið á sjá síðan ég fann hann því ég man að fyrst þegar ég fann hann var gatið heilt. Hann hefur aðeins tærst upp en táknin á báðum hliðum sjást enn nokkur greinilega. Tíminn vinnur á honum líkt og öðrum hlutum.“

Mynt frá þessum tíma er afar fágæt, bæði hér á landi sem og í öðrum löndum, segir Anton Holt myntsérfræðingur. Þó hafa nokkrar slíkar fundist hér víða um land. „Það eru helst Þingvellir sem skera sig úr hvað fjölda fundinna mynta varðar enda fornleifauppgreftir þar verið reglulegir,“ segir Anton. 

Fréttin birtist fyrst í Fréttablaðinu.