Árni: Frakkarnir spila allt öðruvísi en N-Írarnir

Árni Vilhjálmsson, framherji U-21 árs landsliðsins, býst við að leikurinn gegn Frökkum á morgun verði öðruvísi en leikurinn gegn N-Írlandi á föstudaginn.

„Frakkar spila allt öðruvísi en N-Írarnir. Ég býst við erfiðum og öðruvísi leik,“ sagði Árni í samtali við KSÍ.

Íslensku strákarnir eru í frábærri stöðu í sínum riðli í undankeppni EM 2017. Ísland er á toppi riðilsins með 15 stig og á leik til góða á Makedóníu og Frakkland sem eru í 2. og 3. sæti.

Það er því mun meiri pressa á Frökkum fyrir leikinn í Caen á morgun.

„Já, en við þurfum líka að ná góðum úrslitum. Það er mikilvægt fyrir okkur til að halda okkur á þeim stað sem við erum á,“ sagði Árni sem var í byrjunarliðinu í sigrinum á N-Írum.

„Það er mjög jákvætt að eiga leik til góða. En það þýðir ekkert að pæla í því, við þurfum bara að fara í þennan leik til að vinna hann.“

Viðtalið í heild sinni má sjá í spilaranum hér að ofan.