Innlent

Stefnir í gott grillveður á Eurovision um land allt

Nanna Elísa Jakobsdóttir skrifar
Greta Salóme verður fulltrúi Íslands í Eurovision þetta árið.
Greta Salóme verður fulltrúi Íslands í Eurovision þetta árið. Vísir
Veðurstofa Íslands býst við hinu ágætasta vorveðri á landinu öllu eins og það er orðað í hugleiðingum veðurfræðings dagsins. Þá er búist við heilmiklu sólskini um land allt.

„Hiti fer væntanlega hæst í 13 stig syðra, en heldur svalara verður norðaustanlands. Á morgun hlýnar enn frekar, en dregur þá heldur fyrir sólu vestanlands. Næstu daga er síðan spáð vestlægum vindum með hlýndum og fremur þurru veðri á öllu landinu,“ skrifar veðurfræðingur á vakt.

Þó þykknar upp norðvestan til í dag og sums staðar verða þar þokubakkar. Á morgun bætir í vind, sérstaklega norðvestan til. Skýjað verður vestanlands og sums staðar þokuloft við sjávarsíðuna, en annars bjartviðri eins og fram kemur á vedur.is.

Á þriðjudagskvöld stígur Greta Salóme á svið Globen í Stokkhólmi sem fulltrúi Íslands í Söngvakeppni evrópskra sjónvarpsstöðva. Þjóðin er væntanlega full tilhlökkunar og það ætti því að gleðja marga að ágætlega viðrar til grills á þriðjudagskvöldið. Þurrt verður um allt land og nokkuð stillt á öðrum stöðum á landinum en á Vestfjörðum og í Vestmannaeyjum. Þá gefur langtímaspá til kynna að sól verði um allt land þegar aðalkeppnin fer fram á laugardagskvöld fyrir utan á höfuðborgarsvæðinu þar sem er búist við að verði skýjað. Hiti fer alveg upp í þrettán stig.

Veðurhorfur næstu daga:

Á þriðjudag:

Suðvestan 10-15 m/s NV-til, en annars 3-8. Skýjað V-lands og sums staðar súldarlofti við sjávarsíðuna, en bjartviðri aystra. Hiti 6 til 15 stig, hlýjast A-til.

Á miðvikudag:

Vestan 5-10 m/s, skýjað, en þurrt að kalla N-til, en yfirleitt léttskýjað syðra. Hiti 6 til 15 stig, mildast SA-lands.

Á fimmtudag, föstudag og laugardag:

Hæg vestlæg eða breytileg átt og þurrt að kalla. Fremur svalt í veðri NA-til, en annars hlýindi.

Á sunnudag:

Útlit fyrir suðvestanátt með vætu, einkum S- og V-til, en áfram hlýtt í veðri.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.