Boða kosningar í október

Oddvitar ríkisstjórnarflokkanna og oddvitar stjórnarandstöðunnar funduðu í gær um málaskrá ríkisstjórnarinnar. Á fundinum kom fram að stefnt yrði að kosningum í októberlok.

Sigurður Ingi Jóhannsson forsætisráðherra fór yfir málaskrá ríkisstjórnarinnar á fundinum en þar er að finna þau mál sem ríkisstjórnin leggur upp með að takist að ljúka áður en gengið verði til kosninga.

Um tuttugu mál eru á lista ríkisstjórnarinnar.

Árni Páll Árnason, sem sat fundinn fyrir hönd Samfylkingarinnar, sagði í samtali við fréttastofu að meðal þess sem hefði verið rætt væru húsnæðismálin. „Þarna eru náttúrulega þjóðþrifamál sem það hefur aldrei staðið á okkur að afgreiða, eins og húsnæðismálin þar sem ágreiningurinn hefur fyrst og fremst verið á milli stjórnarflokkanna,“ segir Árni Páll.

„Svo eru þarna einstaka mál sem eru ekki komin fram þannig að við vitum ekki hvað í þeim er.“ Hann sagði að sjálfur hefði hann kosið að kosningar færu frekar fram í vor en í haust.

Fréttin birtist fyrst í Fréttablaðinu 23. apríl