Maíspá Siggu Kling – Naut: Mundu að þú situr uppi með sjálft þig!

Elsku hjartans Nautið mitt. Við erum að fara að eiga afmæli! Já, ég segi við því að ég er líka naut!

Besti tíminn fyrir þig í maí er eftir tíunda maí. Þá er eins og allt það sem þú ert búið að vera að bíða eftir detti inn. Blessuð plánetan okkar, Merkúr, er „retrograde“ eða fer að ferðast afturábak til 21. maí.

Það þýðir að þetta verður aldeilis spennandi tími og þú þarft virkilega að takast á við hlutina sjálft. Þá fyrst munt þú sjá hvað þú ert nautsterkt.

Það er eins og þú rísir upp og ljómir svo fallega eftir miðjan mánuðinn. Það verður eitthvað svo skemmtileg orka í kringum þig í maí og eins og þér takist að framkvæma ótrúlegustu hluti! Þér finnst eins og þú sért ekki búið að skipuleggja allt nógu vel. En vittu til, svo finnur þú allt í einu: „Já, þetta er allt að smella!“

Þú ert búið að vera titrandi á beinunum yfir því að þú sért ekki á réttri braut og sért búið að taka að þér alltof mikið af verkefnum. En einmitt þá virðist þú fá hjálp úr öllum áttum og heilmikið hrós fyrir það sem þú ert búið að vera að gera.

Þú ert að sigla inn í friðsælt sumar, það þýðir samt ekki að það verði ekki skemmtilegt, elskan mín, ekki hafa neinar áhyggjur af því. Í sumar munt þú fá það jafnvægi sem þú elskar og það er eins og þú finnir þig einhvern veginn upp á nýtt.

Þú ert svo ástríðufullt, elskan mín. Þú þarft bara að beina ástríðunni í rétta átt. Þú verður svo ótrúlega svekkt þegar þú gerir of mikið af einhverju og allar öfgar hindra þig og hægja á þér svo þetta friðsama og skemmtilega gleðisumar, þar sem þú átt eftir að sjá að þú ert í raun með fullkomna stjórn, er nákvæmlega það sem þú þarft núna.

Fyrir ykkur sem eruð á lausu þá er það algengt að vera svolítið ástfanginn af því að vera ástfanginn, og líka fyrir ykkur sem eruð í sambandi.

Mundu bara að elska fyrst og fremst þig og hugsa að þú ætlar að vera að hanga með þér alla ævi. Þú getur náttúrulega skilið við maka og vini, flutt úr landi eða hvað sem er en þú situr alltaf uppi með sjálft þig, elskan mín!

Svo slagorðið þitt þegar þú vaknar þennan mánuðinn er: Ég elska mig, ég elska lífið, og allt mun leysast!

Lífið er gott,

þín Sigga Kling

Fræg naut: Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj. snillingur.