Barist um sálir í Kolaportinu

Vilji menn fá slettu af fjölbreytileika fólks á Íslandi í dag er Kolaportið góður staður til þess að byrja á. Þangað inn rata um hverja helgi fulltrúar flestra samfélagshópa landsins í bland við ferðamenn sem hingað koma frá öllum heimshornum. Er hægt að hugsa sér betri stað til trúboðs?

Síðastliðin ár hefur venjulega verið hægt að finna bás í Kolaportinu þar sem múslimar hafa kynnt áhugasömum trú sína. Mansoor Malik trúboði frá Þýskalandi hefur séð um básinn síðustu misseri en hann hefur verið þar fyrir hönd Ahmadiyya múslima.

En glöggir Kolaports gestir hafa tekið eftir fjarveru hans þar síðustu vikur en þess í stað er nú kominn kristinn bás að boða fagnaðarerindið þar sem m.a. er hægt að nálgast hin ýmsu trúarrit (líka á arabísku) sem og að láta biðja fyrir sér – allt án endurgjalds í nafni Jesú Krists.

Stofnuðu básinn til höfuðs múslimum

Kristni básinn var settur upp að frumkvæði félaganna Hilmars Sigurðssonar úr Hvítasunnukirkjunni Fíladelfíu og félaga hans Rúnari Loftssyni sem starfar með Hjálpræðishernum. Básinn er því ekki á vegum einhvers eins söfnuðar.

„Við erum fyrst og fremst að boða fagnaðarerindið,“ segir Hilmar og segir marga forvitna um komu þeirra inn á markaðinn. „Við bjóðum m.a. upp á Nýja Testamentið gefins. Við erum að reyna safna að okkur efni á öllum tungumálum, því það er álíka mikið af ferðamönnum þarna og af okkar fólki, Íslendingum.“

Meðal annars er hægt að finna þar Nýja Testamentið ritað á arabísku. Hilmar viðurkennir að þeir félagar hafi meðal annars ákveðið að setja upp básinn til móts við trúboð múslima á staðnum.

„Það var múslimi þarna í Kolaportinu. Það var rótin af þessu. Við erum kristin þjóð aftur í aldir og okkur fannst þá að við ættum að vera kynna okkar frelsara þarna, Jesú Krist, til móts við múslimana. Það ýtti okkur af stað með þetta.“

Ætli Guð hafi ekki bara sópað honum út?

Hilmar segir lítil samskipti hafa átt við Mansoor en viðurkennir að hafa rétt honum prentað spjald með frelsisbæninni. Skömmu eftir það hafi trúboð múslima í Kolaportinu hætt.

 „Ætli Guð hafi ekki bara sópað honum út?,“ segir hann og hlær. „Ég veit ekki hvernig þetta virkar.“

Hafið þið áhyggjur af vaxandi menningu Islam á Íslandi?

„Ég hef nú persónulega ekki miklar áhyggjur en mér finnst samt að við ættum að vera vakandi. Þetta er bara fólk líka sem við þurfum að ná til alveg eins og allra hinna.“

Og hvað? Snúa þeim yfir til Krists?

„Algjörlega. Við höfum kærleika Krists og það er það sem við bjóðum upp á. Við eigum að sýna aðra ást og elska óvini okkar. Þetta er kannski fólk sem er búið að velja sér leið sem það vildi ekki, eða ætti ekki að fara.“

Hvað meinar þú með því?

„Maður hefur heyrt alls konar sögur. Það er erfitt að staðfesta svoleiðis en við vitum hvað er að gerast í heiminum og hvað menn hafa verið að gera í nafni Islam. Þetta er hættulegur leikur. Síðast bara í Brussel. Maður getur samt aldrei lifað í einhverjum ótta. Það er ekkert gott.“

Hefur þú lesið Kóraninn?

„Nei, ég hef ekki gert það. Það er eflaust meiri hlutinn sem trúir á Kóraninn gott fólk. Menn eru alltaf að skemma málstaðinn sjálfir.“

Biblían og Kóraninn deila nú mörgum sögum. Þar er meðal annars skrifað um Jesú.

„Já, en Biblían er skrifuð langt á undan. Ég þarf að lesa Kóraninn til þess að mynda mér skoðun á þessu, en ég held að þeir taki mikið úr Gamla testamentinu. Þeir líta á Jesú til dæmis sem spámann en ekki guð.“

En er þetta ekki allt sami guðinn sem fólk trúir á?

„Okkar er þrenningar Guð. Það er faðirinn, sonurinn og heilagur andi. Þeir trúa ekki að Jesú sé sonur Guðs. Ég myndi ekki segja að þetta sé sami guðinn því þú verður að hafa Jesú Krist til þess að geta nálgast Guð. Hann er tengingin við faðirinn á himnum.“

Aðspurður um árangur líkir Hilmar verkefni hans og Rúnars við sáningu. Þeir deili fræjum í Kolaportinu en það sé svo sjálfur Guð sem vinni verkið til enda.

Ekki náðist í Mansoor Malik við gerð þessara fréttar, þrátt fyrir ítrekaðar tilraunir.