Lambert var ánægður með að vera rekinn frá Villa

Paul Lambert, fyrrverandi stjóri Aston Villa, segist hafa verið ánægður þegar hann var rekinn frá Aston Villa. Lambert var rekinn í febrúar á síðasta ári eftir að verið við stjórnvölinn hjá Aston Villa í þrjú ár.

Síðan þá hefur Villa verið í bullandi vandræðum. Þeir eru nú í neðsta sæti úrvalsdeildarinnar, á hraðri leið niður í B-deildina og leikmennirnir hafa verið harðlega gagnrýndir fyrir þeirra frammistöðu.

„Strákarnir hjá Villa á þessum tíma gáfu allt sitt í þetta og það var ekki neinn tímapunktur þar sem ég labbaði í burtu og hugsaði að við hefðum hent handklæðinu inn,” sagði Lambert og hélt áfram.

„Við fundum að hlutirnir væru að verða erfiðari. Eins og ég hef sagt áður, þá er Villa frábær klúbbur og mun alltaf vera, en ég vissi að minn tími væri kominn.”

„Sumt var aldrei á réttri leið og þegar þetta gerðist, að mér var sagt upp, var ég mjög ánægður að það gerðist,” sagði Lambert kokhraustur.

Blackburn réð Lambert fyrr á þessu tímabili og hann er nú við stjórnvölinn í B-deildinni, en hann skrifaði undir tveggja og hálfs árs samning við Blackburn í nóvember eftir að Gary Bowyer var sagt upp störfum.

„Hjá Blackburn ákvað ég að vera ekki með sömu rútínu og þegar ég var með hjá Aston Villa. Það voru hlutir sem ég lærði klárlega frá þeim tíma,” sagði Lambert að lokum.