Stefni á að komast í úrslit

„Það var erfitt að velja hópinn. Ég get ekki sagt annað,“ segir Freyr Alexandersson, landsliðsþjálfari kvenna, en hann tilkynnti í gær 23 manna hóp sem tekur þátt á Algarve-mótinu í byrjun næsta mánaðar.

Íslenska liðið er í riðli með Danmörku, Kanada og Belgíu. Leikir liðsins verða 2., 4. og 7. mars. Svo er leikur um sæti þann 9. mars. Mikið spilað á stuttum tíma.

„Það er bara einn hvíldardagur á milli fyrsta og annars leiks þannig að ég geri ráð fyrir því að það verði 8-9 breytingar á liðinu þá. Við munum því rúlla vel á hópnum í þessu móti. Það styttist í alvöru leiki hjá okkur og við þurfum að fá síðustu svör með ákveðna leikmenn,“ segir Freyr og bætir við: „Við höfum verið að fá bæði jákvæð og neikvæð svör frá nokkrum leikmönnum sem eru ekki með okkur núna. Við vitum hvað við höfum þar. Þetta mót er því síðasta próf fyrir nokkra leikmenn.“

Sjá einnig: Algarve-hópurinn tilbúinn

Rakel Hönnudóttir er meidd og Guðmunda Brynja Óladóttir er ekki valin. „Hún er að banka á dyrnar sem og Ásgerður Stefanía. Ég veit hvað ég fæ frá þessum stelpum og ákvað að prófa aðra leikmenn núna.“

Þetta mót hefur alla tíð verið gríðarlega sterkt en er ekki eins sterkt núna og áður. Bandaríkin, Þýskaland og Frakkland taka þátt í öðru móti að þessu sinni en mótið er eftir sem áður sterkt.

„Við fengum góðan riðil og svo snýst þetta um hversu vel gengur hjá okkur. Ég er mjög ánægður með mótið. Það sem ég er að vonast eftir að fá út úr þessu móti er svör í ákveðnum leikstöðum þar sem er lítil breidd. Til að mynda í bakvarðarstöðunum. Svo vil ég sjá hvernig ákveðnir leikmenn eru í hóp í svona aðstæðum í tíu daga. Bæði andlega og félagslega,“ segir Freyr en hann er óhræddur við að segja að hann ætli sér stóra hluti á mótinu.

„Mig langar að fara með liðið í úrslitaleikinn. Við höfum ekki verið að setja okkur svona markmið áður. Ég vænti þess að Brasilía vinni hinn riðilinn og það væri mjög gaman að mæta þeim í úrslitum. Þetta er undir okkur komið og við getum alveg reynt að vinna þetta. Ég vil búa til meiri metnað og að við þorum að segja að við ætlum að vinna þetta mót. Sama þó þetta sé æfingamót. Það gerist ekkert ef við vinnum ekki. Ég vil að við þorum og ætlum okkur að gera eitthvað.“