Benitez gagnrýnir forseta Real: Allt þurfti að vera fullkomið

Rafa Benitez, sem fyrr í vetur var rekinn frá Real Madrid eftir aðeins nokkra mánuði í starfi sem knattspyrnustjóri, gagnrýndi forsetann Florentino Perez þegar hann var gestur í myndveri BT Sport í Englandi í gærkvöldi.

Benitez er fæddur og uppalinn í Madríd og spilaði sem ungur knattspyrnumaður hjá félaginu og hóf svo fyrst störf sem þjálfari þar aðeins 26 ára. Hann var svo aftur ráðinn til félagsins síðastliðið sumar en fljótlega kom í ljós að þolinmæði forsetans var lítil.

„Það verður allt að vera fullkomið. Um leið og einhver vandamál koma upp eða forsetinn telur að það séu einhver vandamál, þá ertu í vanda.“

„Ég taldi að það væri allt til staðar til að við gætum staðið okkur vel. En þeir urðu nokkuð taugaóstyrkir, stuðningsmennirnir urðu nokkuð taugaóstyrkir og forsetinn líka og þá var ákveðið að skipta um stjóra.“

Benitez sagði að Perez væri með stöðuga nærveru í kringum liðið. „Hann er alltaf í kringum liðið, að tala við leikmenn og að tala við blaðamenn á hverjum degi. Það er ekki auðvelt fyrir knattspyrnustjóra að upplifa það, sérstaklega eftir að hafa verið á Englandi.“

Hann segir að Real Madrid skorti stöðugleika og að það sé helsta ástæðan fyrir því að félagið hafi aðeins einu sinni orðið Spánarmeistari á síðustu sjö árum - en Barcelona fimm sinnum.

„Maður verður að berjast við Barcelona og Barcelona er með ákveðinn leikstíl og hugmyndafræði. En það er skipt um stjóra hjá Real Madrid á hverju ári og þá þarf alltaf að byrja upp á nýtt.“

„Barcelona hefur verið í úrslitum bikarsins í sex skipti á síðustu átta árum. Liðið á tvöfaldt fleiri titla en Real Madrid á þeim árum sem forsetinn hefur verið við völd. Barcelona býr yfir stöðugleika og það er lykillinn að því að vinna deildina.“

Benitez sagði enn fremur að honum hafi þótt svekkjandi að hafa verið rekinn eftir að hafa starfað hjá Real Madrid í 20 ár á sínum tíma, bæði sem leikmaður og þjálfari. Hann hrósaði þó Perez fyrir að hafa sinnt viðskiptarekstri félagsins vel en að sífelldar breytingar hans á stjórnun knattspyrnliðsins sé vandamál sem þurfi að laga sem fyrst.