Vill að sonurinn yfirgefi PSG

Faðir Edinson Cavani hefur hvatt son til að yfirgefa PSG og fara til Man. Utd, Real Madrid eða Juventus.

Faðirinn segir að sonurinn sé orðinn langþreyttur á því að fá lítið sem ekkert að spila sem aðalframherji liðsins. Þar er Zlatan Ibrahimovic alla jafna og Cavani þá á kantinum.

Cavani skoraði þó sigurmarkið gegn Chelsea í Meistaradeildinni á þriðjudag.

Luis Cavani segir að PSG hafi gefist upp á syninum og því sé lítið annað að gera en að leita fyrir sér annars staðar.

„Zlatan er ekki til í að spila á kantinum og því er Edinson hent þangað. Honum líður ekki vel en hann væri hamingjusamur ef hann fengi að spila sem nía,“ sagði Luis.

„Ég vil sjá hann spila fyrir Real Madrid, Man. Utd eða Juventus.“

Cavani kom til PSG frá Napoli árið 2013 á 55 milljónir punda. Hann á tvö ár eftir af samningi sínum við félagið. Hann hefur skorað 16 mörk í 35 leikjum í vetur.